仲有唔夠一個月就到端午節，老媽又開始着手包糉。我叫佢唔使包，等小妹代勞，點知佢回敬話旨意我，今年唔會有糉食。嬲得我飛身走去鴻星搵大廚高穩固師傅，討教包糉秘技。高師傅話佢啱啱鑽研咗兩款全新糉子，一款係滋肺補腎嘅蟲草花水鴨糉，最啱老人家；一款日本番薯糙米糉，啱晒好似小妹啲怕肥靚女OL 啦。
高師傅話日本番薯糙米糉易做啲，糉米包括糯米、糙米各浸水半小時，紫米要加水蒸20 分鐘，再將三種米撈埋一齊加生油及素油。番薯餡製法將番薯批皮後一半切粒，一半拎去蒸30 分鐘再攪溶，撈埋番薯粒加糖，揑成大小適中嘅番薯餡，每件底部加糕粉。
高師傅跟住邊講邊包糉，先將兩塊竹葉粿成三角形嘅葉兜，放入半滿糉米，番薯餡置中後蓋上糉米，左右兩邊再覆蓋兩塊竹葉及摺紮成糉形，包水草。放入滿水嘅煲煲5 小時，熄火再焗5 小時。
至於蟲草花水鴨糉要先將糯米浸半小時，切粒淮山、薏米同芡實各浸三小時後，撈埋已炒黑芝麻、雞粉、生油及豬油成糉米；另將開邊綠豆浸兩小時後，加入沙薑粉、雞粉同杞子。水鴨胸肉醃製切片炸熟，「之後包糉先放糯米、綠豆，再放鴨肉片、乾瑤柱、蟲草花，再放綠豆同糯米。煲法同番薯糉一樣。」
包糉班收費$280
小妹見高師傅包一隻糉幾分鐘就搞掂，問佢有乜秘技，佢笑笑口話工多藝熟啫。鴻星本月25 日一連三日開包糉班，每位收280 蚊，有興趣致電2628 0080 查詢。
糉子材料（10 隻份量）
－蟲草花水鴨糉－
糉米：糯米600 克，淮山、薏米及芡實各38 克，黑芝麻12 克
糉豆：開邊綠豆600 克、杞子20 克
調味料：生油60 克、豬油20 克、鹽15 克、雞粉3 克
餡料：水鴨胸肉150 克、乾瑤柱10 粒、蟲草花
－日本番薯糙米糉－
糉米：糯米600 克、糙米75 克、紫米38 克
糉豆：不需要
調味料：生油45 克、素油15 克、沙糖10 克、糕粉7 克
餡料：日本番薯及番薯粒各600 克
如果您喜歡這篇文章，請按「讚」或分享給您的朋友，以示鼓勵。
