都市人生活緊張、壓力大，間中失眠或「瞓得唔好」在所難免。惟長期徹夜難眠、經常扎醒，甚至早醒後無法再入睡，可能是患情緒病症狀。精神科專科醫生李德誠表示，睡眠問題可以是都市人的情緒探熱針，3種不同類型的失眠問題或與焦慮症、壓力爆煲及抑鬱症有關，並呼籲有症狀的市民儘早求診。
記者：梁麗兒
難入睡或患焦慮
一上床「好多嘢諗」，記掛明天發生的事情、或為日間煩惱憂心，致在床上半小時至一小時，輾轉反側無法入睡，可能是與生活習慣有關，也可能是患上焦慮症，自己卻不察覺。
間中有一、兩晚失眠，常見為日間過量攝取咖啡因，如飲太多咖啡、茶或食朱古力。捱夜加班、晚上做運動也會令大腦「著咗機」太活躍，影響睡意。也有人因飲宴後、飲太多茶、或「見番好耐冇見嘅親戚朋友太興奮、被人頂撞咗幾句都會搞到瞓唔著」，建議避免太晏飲咖啡或茶，睡前3小時不要做運動。
若長期難入睡，但與上述習慣無關，或患上焦慮症。焦慮症患者因平日太繃緊，以致躺床上身心無法放鬆，難入睡，「焦慮症嘅病人瞓喺床度冇嘢做仲衰，個人會越諗越醒」。若同時有其他症狀，包括經常緊張、頭痛、頸梗膊痛或胃痛，「啲嘢未發生都諗定先、擔心定先」，都可能患上焦慮症。
壓力太大易扎醒
長期承受沉重壓力，都會令人無法熟睡，不能「一覺瞓天光」便是明顯例子。一般情況下，翌日早上要考試、見工或升職面試，前一晚都可能會緊張到在發夢期間扎醒。若持續半個月、幾乎每晚都扎醒，便要想想是否壓力太大，是時候抽空為自己減壓，找自己有興趣的方法，如跑步釋放壓力等。其他反映壓力大的症狀，包括脾氣變得暴躁、容易頭痛、腹瀉，容易疲累及難以集中精神等。
早醒或抑鬱先兆
經常早醒後無法再入睡，可能患上抑鬱症。當事人早醒後，可能會有心慌、作嘔、或者「諗嘢諗到眼濕濕，好多負面思想，例如覺得自己好冇用、人生冇希望、怕被人炒等」。
李醫生指血清素下降令抑鬱症病人睡眠規律受影響，容易早醒。臨床上大部份早醒個案，最後都診斷出有抑鬱症。例如原本早上7時起床，但5時醒後便無法入睡，有病人會惡化到3、4點便早醒「瞓唔番」。如持續半個月便要考慮求診。抑鬱症其他症狀包括情緒低落、不開心、思想負面、變瘦及無胃口等。
from:
http://hk.apple.nextmedia ... 160318/19534752
