林文龍和林熹瞳（Rachel）早前為有份投資的電影《我們停戰吧！》拍攝一場激咀戲，戲中兩人發展一段師生戀，情不自禁在文龍家中發生關係。
文龍昨日在電話中直言拍得好辛苦，他說：「我哋喺旺角一間唐樓拍，三十幾度兼冇冷氣，連風扇都唔開得，我哋喺嗰度幾個鐘唔可以亂郁，因為驚Rachel走光，拍完真係腰痠背痛、好似手腳都甩埋，比平時辛苦一千萬倍。」
林文龍表示拍咀戲毋須向老婆郭可盈交代。
為了就鏡頭，兩人要連咀七、八次，Rachel曾要求清場，但卻越清越多人，她苦笑說：「最後有廿幾人睇住我哋拍，兩個人不停流汗，都幾尷尬。」
兩人均對佔中保持中立，但如果政府有過激行動，Rachel表示定必站在學生一方。
斥特首要負責
《我》片打算參加各地不同影展，Rachel直言有期望，她說：「故事係講香港人故事，由鴉片戰爭、沙士同近期國民教育上街示威都有講，希望喚起大眾關注。」
對雨傘革命至今仍未平息，揚言持中立態度的文龍亦斥特首梁振英要負好大責任，他說：「𠵱家香港得一個『亂』字！我覺得每個人都有錯，我有錯都會同四歲囡囡道歉，但呢個政府就唔識認錯。明白後生一代想爭取民主自由，但共產黨做乜嘢點都要一步步嚟。梁振英當初參選用僭建打敗唐英年，但佢山頂間屋仲多僭建啦，之後可以不了了之；仲有港視唔發牌，但ATV冇製作、冇糧出都繼續有牌，一直冇人講到原因。」
採訪：嵐山
From:
http://hk.apple.nextmedia ... 141010/18894781
