港視唔知係咪風水唔好，免費電視牌攞極都攞唔到。估唔到起用大量港視藝人林文龍、林熹瞳（Rachel）、黃美棋、艾威，仲有港視劇《來生不做香港人》導演陸天華去拍嘅電影《我們停戰吧！》都遇上好多阻滯。
曾經做過「怪談女」的Rachel舊年不獲港視續約，失業後膽粗粗攞住自己寫嘅劇本去搵投資者，最終獲黃玉郎同林文龍賞識，投資數百萬元開戲，跟住自己做埋女主角。早前喺印度諾伊達國際電影節獲最佳電影及最佳女主角，之後再獲聖地牙哥獨立電影節連頒8個獎項，文龍升呢做影帝，Rachel更成為雙料影后。
原本係一個好勵志嘅故事，但聽講好多電影發行商都嫌卡士唔夠勁，拒絕畀《我們停戰吧！》片上映。
林文龍同林熹瞳喺《我們停戰吧！》發展師生關係，故事穿梭70年代至今日香港。劇照
黃玉郎同林文龍合資拍新戲，雖然得到10個海外獎項，但至今仍未搵到發行商。
黃玉郎：部戲夠質素
Rachel噚日喺電話度話：「我做埋阿四搵咗多間發行商，睇完試片話好睇，但又覺得題材唔係太商業。」係咪被嫌卡士弱？佢話：「其實文龍都有遊說過我唔好做女主角，但我話咁辛苦做咁多嘢，目的只係想做演員；我知道市面上冇人會揀我，但佢見我咁堅定，最後都好支持！」
文龍就撐到底：「我永遠覺得係劇本行先，冇好劇本發哥搭妮歌潔曼都係死。如果每部戲都係嗰幾個卡士，新人邊有機會上位？」黃玉郎都話有信心最終會搵到發行商：「攞到咁多獎係喜出望外，部戲夠質素就唔使擔心咁多。」
撰文：馮仁昭
馮仁昭
from:
http://hk.apple.nextmedia ... 150410/19106699
