【上環】前晚9點幾，林嘉華同林文龍喺上環四方街互片，佢哋初則口角繼而動武，當時額角黐咗膠布嘅林嘉華，一身打扮似足爛仔咁，佢行到四方街經過一棟大廈時，俾一早埋伏喺嗰度嘅林文龍扯咗去樓梯口，林嘉華即時郁手反抗，兩個人嘈起上嚟，你推我撞場面火爆。
原來佢哋拍緊王維基旗下嘅香港電視新劇《Night Shift》，林文龍喺呢套劇扮演警察，佢同林嘉華見到記者出現都有主動打招呼，表現得好友善，由於現場好靜冇乜途人，所以劇組拍攝得好順利，好快可以收工離開。
林文龍前晚同林嘉華（左）爭執動粗，原來係拍香港電視新劇。由加拿大移民返港嘅林嘉華，笑言拍夜班戲冇時差。
林文龍當街用手搓鼻，有礙觀瞻。
教新人飲酒壯膽
另外，林文龍、林嘉華同湯怡噚日喺中環出席呢部劇開鏡拜神，老闆王維基都有嚟撐場，林熹瞳同劉依靜就性感上陣。林文龍同湯怡喺套劇有親熱戲，問林文龍有冇同老婆郭可盈備案？佢話：「唔使，我同個女成日都係咁。」湯怡聽到抵死話：「吓？我唔係你個女喎！」冇乜演出經驗嘅湯怡，仲爆林文龍教佢拍親熱戲前飲酒壯膽。
採訪：朱志聰、卓寶花
攝影：楊浩賢、黃曉程、仇志德
林熹瞳同劉依靜谷咪上陣，令身材平平無奇嘅湯怡大為失色。
王維基噚日出席新劇拜神，現身撐場為同事打氣。
from:
http://hk.apple.nextmedia ... 130909/18414561
