小朋友揀飲擇食令父母頭痛，更擔心偏食惡習會引致營養不良。營養師教路，兒童因扭計而拒吃某些食物，家長準備的食物種類太單調及無新意，也難令兒童習慣多元進食，建議家長要多花點心思，炮製融入多種食材的精美菜式，讓孩子不會偏食。
記者：梁麗兒
註冊營養師潘仕寶表示，兒童揀飲擇食原因眾多，常見被「踢走」的食物包括魚類、蔬菜及水果等，「好多時小朋友多咗弟弟或妹妹之後，為咗吸引父母注意，就專登唔食嘢，或者食飯時扭計」。另外，曾發生不愉快事件，如曾誤吞魚骨受傷，或「餐餐食魚」也會令兒童抗拒魚類。
避免「手機送飯」
小朋友以家長為榜樣，如父母也有偏食，「好似食咗某啲嘢，會即時面容扭曲」，子女容易有樣學樣，對相關食物反感，故家長以身作則好重要，同時也要避免「手機送飯」。
進食時間也是關鍵，全日制幼稚園通常會讓學童在下午喫茶點，如家長接放學後，再給予其他食物，甚至再食下午茶，小朋友沒有足夠時間消化食物，都會影響晚餐進食量，令人誤解是偏食。另外，過量飲奶或甜飲如果汁，也會阻礙正餐胃口。其實1歲或以上幼童，已可靠進食不同固體食物吸收營養，毋須餐餐飲奶。以3歲兒童為例，每日飲兩杯奶已足夠，每杯240毫升。
兒童經常外出進食、吃太多濃味食物及零食，都會令他們對一些味道清淡，但極具營養價值的食物失去興趣。家長要改善子女偏食問題，須多下工夫，「小朋友唔食一、兩種蔬果無問題，唔食菜心，可以食生菜、西蘭花。唔食豬肉，可改食牛肉、雞肉。最重要唔好成個食物種類都唔食，家長要畀耐性，同子女一齊試食十幾次，搵出合心水嘅食物」。
菜式中加入水果
炮製色香味、有賣相的食物，可增加兒童對食物的興趣，如雜果水果串、水果果凍，可讓兒童嘗試不同水果。另可在菜式中加入水果，如菠蘿炒飯、士多啤梨排骨，也可令兒童增加攝取纖維。
正餐也可搞搞新意，如不想餐餐吃飯，家長可烹調其他澱粉質食物，如飯糰、薄餅、蕃薯、薯仔、通心粉等，同樣令兒童食得有營養。
怕魚有腥味，烹調時加入檸檬汁辟味，或可吃腥味較少的三文魚、紅衫魚。
親子食譜兩款
「彩虹甜筒」（二人份量）
材料：
雪糕筒2個
原味乳酪一杯約120克
高纖穀類早餐麥片2湯匙
士多啤梨粒、藍莓半杯
做法：
1.在甜筒依次序放入一層水果、一層乳酪及一層穀類麥片
2.重複直至達到甜筒的頂部即成
益處：
乳酪含豐富鈣質，對骨骼和牙齒健康有益，水果含豐富維他命C有助增強免疫力
「聰明飛碟」（二人份量）
材料：
水浸罐頭吞拿魚半罐約35克
粟米粒2湯匙
原味乳酪半杯約60克
全麥比得包1個
做法：
1.吞拿魚瀝乾，與乳酪拌勻
2.用星形曲奇餅模在比得包的面層輕壓出形狀並開窿
3.將吞拿魚放入比得包內，在星形開窿處鋪上粟米粒即成
益處：
吞拿魚含豐富奧米加三脂肪酸，對兒童腦部發育及眼睛健康有益
資料來源：註冊營養師潘仕寶
From:
http://hk.apple.nextmedia ... 140702/18784615
