馬賽BB近排認真運滯，擔演嘅《神探高倫布》收視欠理想，畀人鬧爆嗌晒腰斬外；又被指介入宋熙年同陳智燊嘅「熙燊戀」，令佢兩個分手收場，更傳出佢畀龔嘉欣、朱璇、岑麗香等無綫小花杯葛。
黑處未算黑，馬賽BB早前因信錯家傭而被偷錢，事緣佢將提款卡同卡密碼，交畀僱用僅四個月印傭代為提款，對方有機可乘，兩度偷卡提走3,000元。事後馬賽亦自嘲愚蠢，稱自己容易相信別人。
接二連三發生倒楣事件，馬賽BB昨日喺微博有感而發：「一見到他們，疲憊煩惱都煙消雲散，我的正能量小天使們。」
昨午，又再update微博，未知係咪覺得自己容易信人、到頭來受傷害嘅係佢自己，馬賽BB好感性咁講：「我以為，只要以善待人，別人必會感恩相報。我以為……但當我發現，別人可以為了我的日記本這個『物質』，而把我珍藏的回憶任意銷毀時，我已經不止心寒，而是心在絞痛，這豈止是無價寶。我以為人與人之間是要平等互愛的……我以為……我以為……最近讓我覺得，我所有的『我以為』都不屬於這個社會……」
之前已有報道話，馬賽拍《神探高布布》時，曾兩度自殺，仲曾有工作人員話，聽到馬賽BB話﹕「我唔屬於呢個世界....留喺度都冇意思！」好令人好擔心喎！
from:
http://hk.apple.nextmedia ... 130504/18249059
