馬賽「死敵」情場失意

一四年，馬賽嘅艷舞短片曝光後，佢同內地女製片汪子琦就輪流發功，互相狂數對方。先係馬賽喺記招上，話短片係舊愛要求而拍，慨嘆愛錯人；繼而汪子琦開腔指控馬賽同阿媽，要求一次過畀一年家用，又要豪宅首期及養女費，仲爆埋佢兩個去越南旅行時，曾經喺森林「野戰」尋開心，呢場隔空罵戰，真係精采過唔少電視劇。
講番轉頭，當年因為馬賽介入，汪子琦同富婆Laura嘅七年「夫妻情」先至決裂。據東姑所知，汪子琦同馬賽擘面後，為咗o氹番舊愛，用盡各種攻勢，死纏爛打之餘，既送花又不斷傳求愛短訊，以及搬近Laura嘅寓所。女人好容易心軟嘅，汪子琦結果都冧掂Laura；不過，發生咗咁大件事，心裏面點會冇刺呀？東姑收到風，Laura為咗馬賽呢件事，就好似M-come咁樣，每個月嘈一嘈，佢兩個終於喺早前又再宣告分手。
至於馬賽o依家嘅生活又點呢？難忍喺香港畀人指指點點嘅佢，走咗去北京發展，隨住時間嘅治療，心情開朗番晒。早排，馬賽仲同「少年食神」林澄光，去咗大擦燒榴槤，東姑見到已經流晒口水！

去咗北京發展嘅馬賽，早排同「少年食神」林澄光一齊大擦燒榴槤，好happy吓喎。

當年因為馬賽嘅介入，令Laura同汪子琦嘅七年「夫妻情」曾一度決裂。

Laura同汪子琦一一年喺紐約「結婚」，未識馬賽之前，兩人好恩愛。

有指，汪子琦當年開拍電影《愛在星空下》，原本係想用馬賽做女主角，事件發生之後，改咗用江若琳。

早排，汪子琦喺社交網自爆單身，認真慘慘豬。