老婆被掉低空虛成病祖藍害李亞男患抑鬱

王祖藍近年顧住北上賺人仔，冷落愛妻李亞男，令老婆患上抑鬱。攝影：沈健程
【《蘋果》專訪】王祖藍和05年國際華裔小姐冠軍李亞男結婚兩年，祖藍為養家，婚後北上賺人仔，老婆留港獨守空房，卻因沒老公依靠，試過生病要獨自進院，寂寞難耐，抑鬱垂淚，令祖藍內疚心痛。所以他打算明年完成手頭工作，停工造人，他希望貼身照顧陀B的李亞男，做個盡責好老公。
現年37歲的王祖藍於14年在無綫台慶直播期間，高調向女友李亞男求婚，這段長短腳之戀翌年完婚，婚後一直未有所出，祖藍認為要完成手頭所有工作，明年才開始努力造人。近年祖藍北上發展，夫妻聚少離多，祖藍日前在觀塘接受本報專訪，大爆老婆早前試過抑鬱大喊。

祖藍和李亞男結婚兩年，他希望明年停工陪老婆兼造人。資料圖片

祖藍接拍內地真人騷《奔跑吧兄弟》，酬金可觀。微博圖片
「無啦啦屋企喊」

祖藍透露新婚不久，要逗留橫店3個月拍內地劇《哪吒與楊戩》，獨自留港的李亞男卻突然抱恙入院，因為外父外母都在加拿大，祖藍說：「跟住佢真係抑鬱，自己無啦啦喺屋企喊，爸爸媽媽唔喺身邊，嫁咗個老公又唔喺身邊，咁點呀？嗰件事之後，我就冇再接電視劇同電影。」祖藍一直為此事感內疚，即使李亞男將來十月懷胎，身邊當然不能沒有祖藍照顧，所以他有意停工待妻安胎兼陪產，祖藍認真地說：「我驚佢抑鬱呀！佢會㗎，一定要我陪住㗎。」
祖藍與李亞男06年相識，初次邂逅已對李亞男留下深刻印象，他說：「佢拎住個名牌袋，入面有本聖經，最有趣嘅係佢個手袋原來係A貨，哈哈，哎呀對唔住。」兩人火速過電，惟當時祖藍仍在做兒童節目，收入不多，反而李亞男是華姐冠軍，彼此間困難重重，祖藍說：「祈過禱覺得唔平安，唔係竹門對竹門，嚇死佢屋企人。佢屋企人嗰時約我傾偈，佢屋企喺上海係好有教育嘅家庭，父母喺藝術大學畢業，啲闊太見佢都會話『呢個係我新抱就好喇』，但一下子見到我，唔係淨係矮，仲有咩咩咩慳啲啦Baby，我個女點解會同個唔男唔女嘅人一齊？畀我都驚啦，所以好明嘅。」

李亞男是05年華姐冠軍，卻與祖藍譜出長短腳之戀。資料圖片

李亞男父母被祖藍邀上內地拍真人騷節目。微博圖片
扮女人被嫌棄

祖藍和李亞男拖拉到09年才拍拖，祖藍以扮女人出位，他笑謂：「其實亞男都唔鍾意我扮女人，我覺得自己應該係落咗佢降頭，佢為咗我決定唔返加拿大，佢真係可以嫁好啲。你唔好計𠵱家嘅我，佢同我一齊嘅時候我都未咁富有。」
採訪：嵐山、懷鈺
髮型：Ted Yeung
化妝：K.T.Tsui
服裝提供：SON OF A KING
造型：Dicky Lee
from:http://hk.apple.nextmedia ... 170929/20167106

祖藍曾於內地節目《百變大咖秀》扮鄧紫棋，成功掀話題。資料圖片
近年北上賺人仔的王祖藍不時在網上發表愛國論，惹來香港網民唾罵，祖藍說：「已經習慣被標籤，我個樣等於人民幣吖嘛！其實我又覺得唔係一個好大問題，蔡康永話『你做得呢行，賺得呢啲錢，就要預咗人哋咁樣話你』。」他承認內地市場大，收入提高：「初初喺TVB主持兒童節目，底薪得4,800元，爆騷大約萬幾二萬人工。返內地拍《百變大咖秀》，一集已經係幾個月人工。」

王祖藍直言賺人仔就預了被標籤。攝影：沈健程
短短5年，祖藍升做億萬富翁，早前擲1.14億買入大埔複式豪宅連泳池，他卻不介意重提往事：「我以前都攞過綜援，爸爸02年走咗，我03年先演藝畢業，阿媽每朝落茶餐廳做幾個鐘兼職，晏晝買餸，夜晚返屋企煮飯。因為細佬妹仲細，雖然嗰時最困難，但反而係我最堅強嘅時候。」

採訪：嵐山、懷鈺
from:http://hk.apple.nextmedia ... 170929/20167107

陳凱琳背劇本要用拼音，祖藍直斥無綫不應安排她拍古裝。資料圖片
王祖藍算是被無綫一手捧紅，但他卻揶揄無綫「捧死新人」：「點去栽培一個新人係好大問題，主持都一樣，邊個係蝦人、邊個係下把，呢啲matching係要度。以前TVB可能有《歡樂今宵》，但係𠵱家train唔到人。」他提到陳凱琳在《四個女仔三個BAR》和岑麗香在《巴不得媽媽》均表現好：「後尾點解要佢哋做古裝？連廣東話都未講得正，點講古裝對白？」

祖藍感謝曾志偉當年在《獎門人》中提攜：「你要捧新人，一定要有一個前輩帶一個新人。」他現跟邵氏合作開工作室：「同無綫有良好關係，呢個體制裏面有好多規矩要守，某程度限制咗自由。將來都應該咁行，如果唔係，只會好似當年冇咗周潤發、劉德華、周星馳、梁朝偉……講唔埋欄就走㗎喇！我覺得我係第一個，第二個係黃宗澤。」

採訪：嵐山、懷鈺
from:http://hk.apple.nextmedia ... 170929/20167108