有雜誌報道話滕麗名被郭政鴻玩弄感情，男方有老婆有女，仲同阿滕藕斷絲連，陷入三角關係令阿滕抑鬱崩潰，但係阿滕噚日去到觀塘同新劇《掌上明珠》一班演員包括宣萱、陶大宇、商天娥同陳美詩等一齊宣傳，娥姐男友亦有捧場，阿滕心情大好全程笑騎騎，仲同在場演員、觀眾玩得鬼咁開心，唔似情緒出現問題。
阿滕話之前去溫州登台，確實因為表現失準而好唔開心，仲抑鬱咗幾日，佢話：「我好睇重自己演出，嗰日無端要唱《東方之珠》，首歌難唱我又唔識歌詞，表現失準。」
對於佢同郭政鴻嘅緋聞，阿滕話不嬲都冇事發生過，佢強調同郭政鴻係好朋友，至於有冇進一步發展，阿滕話：「唔好再越描越黑，我有SMS畀阿鴻，佢話唔好意思，我話唔緊要冇所謂。」
阿滕話今次事件對身邊朋友，例如譚小環、張可頤受到騷擾都覺得唔好意思，佢話好多傳媒致電佢身邊好友，問佢有冇情緒問題，阿滕話請大家唔好再揣測，如果唔係就斷佢米路，冇人夠膽追佢喎！
同郭政鴻死黨兼老友嘅陶大宇就話阿滕同鴻仔係成年人，自己識得處理，大宇話：「唔係十分壞嘅事情，我都會支持，唔理真定假，我都唔想知。」
至於郭政鴻已有家室，大宇話：「佢話係事實，佢做咗爸爸，做嘢都有動力。」
from:
http://hk.apple.nextmedia ... art_id=13989402
