負皮女子組合FFx甩嘴、甩舞MV一夜成名，網民嘲笑聲此起彼落，他們一邊轉貼騎呢MV，一邊碎碎唸著Freeze的名字：「真係好想Freeze復出呀！」Freeze5年前解散，陳樂榣嫁作人妻開畫室，甄詠珊轉型做主持，只有石詠莉（Sukie）堅持19歲時的歌手夢，由男友鄧健泓（Patrick）膽粗粗出資6位數字為Sukie出Hi-Fi碟，結果令人喜出望外，28歲的Sukie終於脫殼而出，擺脫性感枷鎖，表現真我實力。
撰文：楊潔雯
由陳樂榣（左起）、石詠莉及甄詠珊組成的性感組合Freeze，已於5年前解散了。資料圖片
遭網民嘲笑甩嘴、甩舞的女子組合FFx（圖），舞衣與當年Freeze所穿的十分相似。資料圖片
石詠莉笑言新碟是與鄧健泓的BB。
當年Freeze以性感噱頭吸引萬千宅男，形象深入民心，單飛Sukie以成熟踏實的形象重新包裝卻遭人白眼，她日前接受本報專訪說：「曾經有唱片公司話畀幾多萬我行性感，問我做唔做？當時我一口拒絕，如果應承即係走回頭路，之前堅持努力咁多年就毀於一旦，唔關錢唔錢嘅事，係嗰份對音樂嘅執著，同埋鍾唔鍾意。」
Sukie決心封胸洗底，只是希望做一個合格歌手，她說：「好多人會覺得我依然係以前嗰個形象，佢咁諗我唔介意，不過嗰種理所當然，有時會令我好尷尬，好想話畀人知我唔係咁。過程中要堅持自己底線，做番自己，想自己決定自己嘅將來，之後走得舒服啲，所以有時難免會覺得受到傷害，但我相信有實力，有努力，總會有人聽到。」
鄧健泓（左）投資為石詠莉出發燒碟，甘願做她背後的男人。
壓力難頂都要頂
Sukie遇上生命中兩位伯樂，除男友「瞓身」支持，還有監製何鈞源，她說：「舊年我遇到𠵱家唱片監製，嗰時我係幫佢唱demo，本住學習心態完成呢件事，佢話我可以做得比以前更好，係佢令我想完成夢想，出到呢張《聽聽Sukie's》。另一個係我身邊個位，以前我好冇信心，大家見到我喺組合嗰時無畏無懼，但係我嗰個角色帶畀我嘅後遺症係好冇自信，當面對好多輿論壓力，我就話畀自己聽要頂住，雖然內心係好難過，但係冇辦法，自己唔頂住係冇人幫到你。」
Sukie見到今日走騎呢路線的FFx，她腦海瞬間重溫Freeze昔日的苦與樂，她說：「我冇諗過大家會記得Freeze，我哋真係好勤力好努力，由未出道時一齊十幾個鐘喺排舞室跳舞，練歌花好大氣力，我覺得FFx幾勇敢，勇於表達佢哋想表達嘅嘢，無論大家喜歡唔喜歡，佢哋都有付出努力。我覺得佢哋同我好相似，想唱歌，追夢。」不過，騎呢路線並非長線投資，Sukie說：「佢哋要多啲努力，強化自己音樂造詣同跳舞，到𠵱家我都不停增值自己，學唔同嘅嘢，堅持同努力比一切都重要。」
甜笑叫鄧健泓求婚
鄧健泓和Sukie拍拖兩年，投資6位數字為女友出發燒碟，點解拍拖要傾家蕩產？是儍的嗎？Sukie笑笑口，點點頭說：「係呀！答謝佢惟有平時煮飯畀佢食，因為佢好鍾意，諗住請佢去一個好舒服嘅假期。」
製作新碟過程，兩口子經歷不少樂與苦，Sukie說：「真係我哋嘅baby，我哋冇唱片公司back up，由開始策劃，到後來問朋友搵publishing，都一手一腳去做。」鄧健泓出錢又出力，甘願做其背後的男人，Sukie是時候以身相許？她甜笑說：「咁都要睇佢願唔願意，佢都未求婚，我成日都講佢未求婚。」咁！鄧健泓你識做啦！
from:
http://hk.apple.nextmedia ... 151009/19325722
