鄧健泓（Patrick）四年前因合作舞台劇而與前女子組合Freeze成員石詠莉（Sukie）撻著，去年三月鄧健泓終於肯擺脫浪子，當眾向Sukie求婚，29+1嘅Sukie梗係即刻飯應！但係已經過了一年多時間，他們仍未有所行動，等到鄧健泓買埋樓，又簽約新經理人，他終於實踐承諾，自爆年尾會註冊正式拉埋天窗！
求婚一年都未行動
自從同石詠莉拍拖後，從前女友名單厚過本電話簿的鄧健泓終於肯修心養性，拍拖初期已經公開認定對方俾曬名分，謝絕其他飛來蜢埋身！為了圓女友歌手夢，鄧健泓更不惜傾家蕩產自資為Sukie出碟同搞演唱會，簡直出心又出力！去年夾啱女友獲得IFPI十大銷量廣東碟，鄧健泓更同主辦單位夾計，當眾跪地嚟個驚喜求婚，Sukie當堂感動到喊曬，鄧健泓成功抱得美人歸。
雖然落實結婚，但鄧健泓都希望事業上有點成績，而且希望可以俾老婆Sukie一個安樂窩，所以他早前豪擲五百七十萬，買入深井豪景花園做婚後愛巢，為儲多啲老婆本，鄧健泓狂接幕後工作同頻頻到內地登台搵真銀，離開無線有一段日子的他，近日更泊到碼頭，正式簽約俾蕭定一旗下出碟做歌手重新出發。
鄧健泓去年向石詠莉求婚成功，早前二人到加拿大影婚紗相。
鄧健泓同準老婆石詠莉現身銅鑼灣拍拖行街，其間鄧健泓電話響唔停，石詠莉扁曬嘴抗議。
見女友扁曬嘴，鄧健泓當眾挨落石詠莉氹番佢。行街攬到實
一切都準備就緒，他們落實今年年尾拉埋天窗，二人最近除咗忙著籌備婚禮，都不忘偷閒拍拖享受二人時光，早前鄧健泓就同準老婆現身銅鑼灣一間餐廳醫肚，一向身形fit爆嘅石詠莉似乎並冇特別為婚禮節食，在男友面前將漢堡包大啖大啖咁咬，實行醫飽個肚最重要！叉足電之後，二人隨即轉戰商場行街。
其間鄧健泓電話不停響，Sukie見男友掛住講電話唔多理佢，終於忍唔住扁曬嘴抗議，一向錫女友錫到燶嘅鄧健泓立即收線，並當眾成個身挨落Sukie度氹番佢，真係寃氣！二人又再轉戰其他商場，Sukie睇女裝時，鄧健泓好識做咁企喺門口幫眼，又笑曬俾足意見，超級廿四孝男友囉！
後來記者上前問到鄧健泓婚事籌備嘅進度時，鄧健泓笑住回應：「我哋年尾會註冊，詳情遲啲我哋會公佈，食飯擺酒嗰啲就再遲啲先算。（同對方家長見面傾大禮未？）我哋拍咗四年幾拖喇，你覺得見過未啊？過大禮嗰啲就好易話為啫，擺酒對我來講係請大家食餐飯啫！（會大搞？）唔會喇！我個人不嬲都低調。」
去年鄧健泓當眾跪地求婚，石詠莉感動到喊曬。
為咗俾老婆一個安樂窩，鄧健泓去年豪擲570萬買入深井豪景花園做愛巢。
石詠莉入鋪頭試鞋，鄧健泓好有耐性企喺門口幫眼俾意見。
石詠莉喺男友面前將漢堡包大啖大啖咬，似乎佢並無特別為婚禮節食。
撰文：娛樂組
攝影、攝錄：陳亦龍、蕭敬漁、楊紫
