歌手石詠莉與鄧健泓新婚才半個月，昨日她穿露背婚紗行騷時卻向傳媒投訴，原來老公只顧在內地拍戲，二人婚後只見過一天！她更撒嬌大呻掛住老公掛到茶飯不思，連上圍都縮了水，非常慘慘豬！
石詠莉呻上圍縮水，露玉背相對有睇頭。
石詠莉（Sukie）昨日到金鐘為婚紗時裝表演擔任嘉賓模特兒，訪問一開始，新婚的Sukie就直言要投訴老公鄧健泓（Patrick）：「佢未得閒同我度蜜月，工作太忙，一直喺內地拍戲。」不過隨即又轉口風：「都係嘅，搵多啲錢養屋企。（賺定奶粉錢？）未住，你咁心急做乜？」
造人聽天由命
Sukie認為現在賺錢比較重要，但新婚後只見過老公一日：「好掛住佢，掛住到瘦咗，所以行騷唔使減肥，以前兩日前就要節食，好唔健康。」問到有否向Patrick反映？她稱有告訴老公自己經常夢見他，可惜沒時間探班：「忙出碟，希望今年做多啲原創歌。（造人大計？）順其自然！聽天由命！親朋戚友都好心急，但唔係想有就有。」她希望多點時間二人世界，因成為父母後要以子女為先，花很多時間在教育方面。
提到本來打算2月度蜜月，Sukie坦言不知屆時是否有時間：「希望佢可以抽幾日。（Patrick幾時拍完？）話一月十幾號，但好難講。我茶飯不思，好想有啲時間一齊輕鬆吓。」她透露Patrick患了重感冒，早前回港一天就是為了看醫生，令她非常擔心和心痛。
鄧健泓被投訴工作忙冇慰妻。
石詠莉大男人禁性感
另外，說到這天的婚紗並不性感，Sukie笑言自己結婚時也一樣：「Patrick唔畀，老公大人要審視過啲衫，好大男人。（酬勞高都唔得？）你同佢講吓！其實要睇場合。（其他人行婚紗騷好性感？）我縮咗水，掛佢掛到全個人縮水！」
文：音樂組
攝：秦健輝
石詠莉掛老公掛到瘦
石詠莉昨穿上露背婚紗出席活動，盡現滑溜玉背。
石詠莉昨日到金鐘萬豪酒店出席婚紗活動，胸前保守反而露背，原來性感要獲得老公鄧健泓御准，服裝也要經對方審視。她撒嬌投訴老公冇時間度蜜月，新婚至今只見過一天：「嗰日係老公病咗返香港睇醫生，搞到我好擔心。掛住老公掛到瘦咗，今次行騷唔使減肥，我有同佢反映，發夢都見到佢，希望佢快啲返嚟。」兩人原定下月展開蜜月之旅，但情況可能有變，加上擔心鄧健泓身體狀況，令石詠莉茶飯不思。
造人大計方面，石詠莉說：「我哋都鍾意小朋友，但想搵錢先，順其自然啦！身邊親朋好友都好心急，未結婚前已經催緊我生BB，大家忍耐吓先啦！」
採訪、攝影：卓寶花
