石詠莉在處女騷入面，獨唱Freeze時代的《金睛火眼》。
石詠莉（Sukie）前晚在九展Star Hall舉行個人演唱會，Sukie台上三度感觸落淚，演唱會尾聲，她在台上感謝鄧健泓（Patrick）救命之恩，還向對方示愛。Sukie處女騷獲得Patrick的好友支持，嘉賓有孫耀威、盧巧音、甄詠珊及蔣志光。
Freeze成員之一甄詠珊（左）畀面前隊友石詠莉，擔任其個唱嘉賓又唱又跳。
石詠莉苦練鋼琴一個月，自彈自唱新歌時感觸爆喊。
背後的男人鄧健泓完騷時上台，拖實未婚妻石詠莉答謝觀眾。
「失敗令我長大」
穿上一襲紅色貼身露背晚裝出場的Sukie，唱出《聽不到的說話》及《結他低泣時》後，有點眼濕濕：「歡迎大家嚟到自己首次個人演唱會。」講完便落淚。接着出場的嘉賓孫耀威爆Patrick見女友喊，即摺一長心形紙巾，叫他交給Sukie。
之後，Sukie自彈自唱《聽聽》，又突然喊起來：「好多嘢冇諗清楚，大個之後先知道好多嘢做得唔好，會令到日後失敗，但我唔怕失敗，失敗會令自己長大。」
演唱會尾聲，Sukie在台上再喊，她表示要感謝P先生在懸崖邊救她，又出錢出力支持她唱歌，完成她的夢想。Sukie唱出男友名曲《阿四》，現場播放兩人的生活照和婚紗照，螢幕上更出現「我愛你，阿四」，完騷時，鄧健泓走上台跟Sukie手拖手向觀眾謝幕。
「有色眼鏡睇我」
Sukie在騷後接受訪問，提到三度爆喊：「已經盡量忍住，但係每當講到家人同以前嘅經歷就控制唔到自己，又覺得好感動，因為自資做演唱會係一件好難做到嘅事。」被問到之前不想提前組合Freeze時，她說：「因為以前會有好多好難聽嘅聲音，但𠵱家成熟咗，覺得越過咗困難。」問她是否怕被指整容？她說：「唔單止啦，同埋有好多人用有色眼鏡嚟睇自己，以前淨係想努力唱歌。」
對於未有與Patrick合唱，Sukie說：「佢太忙，付出已經太大，佢話如果喺度唱，婚禮就冇驚喜。」兩人明年計劃舉行婚禮：「搞今次演唱會已經元氣（金錢）大傷，要好好療傷先，要埋晒數睇吓點先。」
採訪：盧妹
攝影：仇志德
from:
http://hk.apple.nextmedia ... 161011/19796715
