小環和老公Eric（左）非常恩愛，夫婦笑言家中的小三是小狗女LaLa。
港姐譚小環與任職保險公司區域總監的蔡強榮（Eric）結婚8年，一直表現恩愛，但日前男方被周刊爆料指他背妻偷食，Eric被拍到跟一名女子到圓方約會，他主動掹對方衫尾和捉手仔，事後小環仍然力撐老公，對他投百分百信任票，但就勸喻老公在公眾場所要檢點，Eric則向老婆致歉，兩人同時否認有小三。
Eric和小環未有受事件影響感情，夫妻前晚拍拖晚飯時，更在facebook貼出恩愛照，但昨有讀者報料起小三底，指與Eric圓方撐枱腳的女子叫阿Man，曾任職宏利保險，更指兩人關係曖昧，暗交5年，而且Eric為人花弗，經常媾女下屬，還指Eric撇下小環相約男同事結伴遊泰國蒲夜場，而他的另一紅顏知己竟是小環手作店和魚蛋檔的拍檔。
疑被人整蠱
對於被爆料指控，Eric昨在電話回應時氣定神閒：「爆我暗交5年，點解咁多年都冇爆出嚟？話我包佢，唔該拎證據出嚟，咁樣講嘢心哋唔好，好冇口德，我當小環拍檔係『細佬』，我哋完全冇嘢，同埋我不嬲去旅行都同埋小環一齊，我唔鍾意蒲夜店，我係『灰姑娘』，好早交人。」
Eric估計是被人整蠱：「我喺保險業咁耐，多年嚟都炒過冇一千都八百人，可能啲人乘機落井下石。」小環接過電話撐老公：「呢啲報料係無中生有，話我老公咁多女，除非佢隱瞞我有三胞胎兄弟，同一時間先分到身。」
據知，Eric最近的而且確把小三LaLa帶回家，並與小環同一屋簷下，但LaLa是貴婦小狗，Eric雖對狗有童年陰影，但愛妻的他還是花數萬元買一隻𠱁老婆，Eric說：「LaLa係唔可以上床嘅小三。」
採訪：劉敏
Eric前晚才與老婆小環往撐枱腳，還把恩愛照貼facebook。
人妻小環全情投入打理魚蛋檔生意，不時到店中幫手。資料圖片
from:
http://hk.apple.nextmedia ... 150620/19190899
