走出黑暗，重見光明。江若琳半年前爆出跟寰宇老闆林小明的合約糾紛，沒經歷過官司風暴的她大受困擾，承受不到壓力，爆發抑鬱症，失眠騰折，差點自尋短見。幸好江若琳及時發現，跳出鬼門關，調整心情後決意重新出發。
撰文：比華利
藝人承受壓力因人而異，半年前江若琳因為合約問題，跟寰宇老闆林小明不歡而散，糾紛至今仍未解決，林小明堅持告到底，江若琳也強硬奉陪，討回公道的過程，她壓力爆煲，早前精神抵不住先輸一仗。
合約糾紛爆出初期，江若琳不停鑽牛角尖致抑鬱症，更甚是失眠影響情緒，差點「跳掣」走過死亡邊緣，幸好及時接受治療，現已康復兼繼續工作，自稱回覆自由身的江若琳，決心每天帶著正能量再戰幕前。
為了不留下爛攤子給父母，江若琳決心振作，重新出發。
媽咪勸退出
回想過去幾個月，江若琳形容是人生中的黑暗日子，她猶有餘悸：「嗰時我精神好困擾，心理好難受，好唔開心，食唔安瞓唔樂，晚晚失眠，呢段日子持續咗半年。」新聞爆出後，加速令江若琳壓力爆煲：「每日擘大眼睇到被攻擊言論，自己消化唔嚟，狗仔車又停曬喺屋企樓下，驚恐到唔敢出街。」
江若琳自爆每天都以淚洗臉，她說：「我攤喺屋企梳化，喊到攰就碌咗落地，成晚都係咁瞓喺地冇郁，我身邊全部係抹過鼻涕嘅紙巾，精神喺崩潰狀態，爸爸同媽咪都擔心死，佢哋輪流過嚟陪我，怕我出事。」家人見江若琳晚晚狂啪安眠藥才可入睡，擔心她越啪越多，帶她看醫生後，發現患上抑鬱症，及時吃藥治理，至今已痊癒，江若琳說：「試過嚴重失眠，我好明白當中痛苦，真係會自尋短見㗎，我有一剎那同自己講，不如熄咗個掣去瞓。」雙親深知女兒情緒陷入谷底，苦口婆心勸告她退出，遠離是非地，江若琳聽從報讀了到英國倫敦留學一年的演藝課程，獲媽咪全力資助。
承擔訴訟費
留英期間，江若琳接到律師信，她必須回港處理：「我唔想咁樣走咗去，留個爛攤子畀父母孭，冇理由咁任性，幾百萬訴訟費要屋企人同我承擔，呢啲始終係我嘅責任。」江若琳把一年課程改為一個月，遊學平復了心情即返港，她回程航機上已想通：「我要努力工作，賺錢打官司，同埋解決生活。眼淚亦已經流乾，我再流都冇用，社會好現實，自己條路點都要繼續行，一定要靠自己行出嚟，我要行出另一片天地。」
告別抑鬱的江若琳恍如脫胎換骨，越挫越強，她對留在娛圈發展決心更加堅定，她說：「當演員係我夢想，即使條路好崎嶇，但夢想係無價寶，我點都會堅持。」江若琳表示復工接job，仍然以機會行先，不會從錢出發，她說：「錢財對我嚟講，由頭到尾都唔係第一位，過去日子，我『義工』都做唔少啦。」
化妝：諺瞳小白
髮型：James Lee of Hair
場地：Hair
林小明與江若琳曾簽下的十年死約，本應在今年5月完結。資料圖片
原本江若琳到英國留學一年，身在當地的她因接到律師信，一個月後即回港處理。微博圖片
From:
http://hk.apple.nextmedia ... 141130/18952426
