江若琳14年同前經理人林小明爆出合約糾紛，對簿公堂，案件至今仍未結束，江若琳為討公道，佢不惜「跑數」做騷，支付大量律師費。堅持到底，江若琳為紀念今年入行十周年，佢將於9月9、10號喺九展開騷會歌迷。
江若琳經理人Cero前日喺facebook分享兩人喺過去三年一齊拼搏辛酸史，但當中好多不為人知事件。「不是每件事情都值得慶賀的。她不定期收到的是律師信、報道她的傳媒高層收到的是投訴電話、電影導演收到的是換角『邀請』、廣告商收到的是不知名賬單......200天前，她的十周年演唱會主辦方出現了，7月的檔期，各單位抓緊時間籌備，導演、音樂總監、服裝設計、贊助商......一切終止在第三次會議。一個又一個的『地獄來電』，一個又一個的退出。誠如她的阿Q精神，我還是要感恩這一切，沒有這一場『午夜凶鈴』，我不會氣憤難平得重新把新投資找回來，感謝閣下，一直努力教後輩成長！」
江若琳昨日都有喺fb轉發Cero的留言，仲好阿Q咁話：「『好小事啫、冇事喎、實拆得掂、實跑到返嚟嘅』，估唔到因為呢幾句我同伴嘅口頭蟬，令我哋已經走過咗1,200日......係1,200日裏，雖然好多嘢經常會喺我眼前無故消失，但係我知道只有一件事到我死嗰日都唔會消失，就係我哋嘅『信念』！！同伴，多謝你！在心中！加油！」
錫到江若琳燶嘅男友、「生煎包王子」蕭潤邦（Oscar）也力撐轉發後留言：「就是你們的樂觀態度才能走到今天！前面還有許多個1200天！請繼續用骨氣活下去！支持你！我偶像江若琳。」佢仲要加埋心心貼圖，無論幾艱難，江若琳都甜在心頭啦！Oscar為咗讓女友圓夢，出錢出力，佢答應包辦演唱會膳食。
《蘋果》昨日打俾江若琳，問到佢對經理人爆seed言論，佢話：「每日送多幾包薯片同薯條俾佢食，等佢呢團火繼續燃燒落去。」至於江若琳前經理人林小明則稱：「冇睇過，冇興趣，亦冇回應。」
from:
http://hk.apple.nextmedia ... 170730/20106237
