江若琳同男友Oscar過第一個亦係婚前最後一個情人節。
江若琳（Elanne）、蕭潤邦（Oscar）計劃年底結婚，呢對甜蜜到爆嘅情侶，日前喺大埔接受「究竟我了解佢幾多？」婚前測試大挑戰，Oscar答中女友鍾意嘅顏色同國家，但Elanne兩題都答錯。寫出對方身份證括號數字，Oscar好鬼馬寫咗個（蠢）字，搞到Elanne笑到失控。而口頭禪一題，Elanne毫不猶豫寫上粗口。去到最後一條最愛是誰，Oscar就心酸寫上「糯米糍（我哋隻貓）」，跟住話：「佢只係有糯米糍，唔記得我㗎啦！」最後由Oscar以七題獲勝。
Oscar好認真做大測試，江若琳顧住整古造怪。
Oscar和江若琳拍拖日子唔算長，但已經計劃年底結婚。
物色婚宴場地
測試結果並唔重要，最重要係睇得出兩人相處嘅幸福同快樂，Oscar話好記得有次俾女友問唔鍾意食乜，自己答唔出激嬲女友，最後就銘記女友唔食肉鬆。而佢最欣賞女友遇到唔少經歷，內心仍然純樸有愛心。Elanne就話：「佢可以保護我，等我唔使好硬朗，萬大事有佢去頂住，等我做番女仔。」拍拖近一年，Elanne學識享受生活，因為男友教佢知道快樂係無價：「如果前幾年一齊就會早啲話我知快樂係乜。」講到婚禮，佢哋兩個都話已經四圍物色場地，希望當日能夠同睇住佢哋成長嘅家人聚一聚。
撰文：馮仁昭
