玩瑜伽唔單止林芊妤（Coffee）玩得叻，就連有8個月身孕嘅陳爽亦一樣咁耍家。陳爽雖然下個月生得，但佢依然相當好動，除咗出席活動之外，仲玩埋孕婦瑜伽，原來佢想自然分娩，希望以健康天然方式生B，所以知道自己有咗之後即刻報讀孕婦瑜伽課程，等生仔時都順利啲！
陳爽呢個單腳跪地動作係受過專人訓練，大肚婆唔好亂試呀！
改定幾個英文名
日前陳爽親身示範孕婦瑜伽，見佢屈膝跪地同單腳獨立平衡等姿勢都輕易完成，身手相當敏捷。陳爽話陀B令胸部升Cup，但同時亦令佢腰背有壓力，瑜伽正好俾佢做伸展動作舒緩。佢仲話：「拉鬆大腿肌肉好重要，從瑜伽學識鼻呼氣、嘴吸氣，生B時用呢個呼吸方式，會令自己冇咁緊張。」陳爽今胎陀仔，佢話中文名由長輩決定，英文名就由佢同老公負責，佢笑話：「改定幾個名，等BB出世後叫佢，應邊個名就用邊個啦。」
早喺5月時，陳爽陀住B仔同老公去西班牙同法國旅行，估唔到勁鍾意旅行嘅佢，又再心鬱鬱計劃出年復活節一家三口去旅行，等B仔可以試嚇坐飛機之餘，佢兩公婆唔使留低小朋友喺香港而搞到心掛掛喎。
撰文：馮仁昭
場地提供：ELITE STARZ
From:
http://hk.apple.nextmedia ... 140908/18858899
