做賭王快婿夢碎，同何超雲玩完的「四失聰」陳山聰，潛水一年有多洗底，直到最近減肥成功，才重操故業返無線拍新劇《官場浮世繪》。重新出發，陳山聰更撈過界，孖住死黨郭政鴻，組成舞獅團隊「獅兄弟」四出表演，舞出另類財路。
有板有眼經歷失「雲」事件，痛定思痛的陳山聰決定還原基本步，返無線拍劇、減肥跑馬拉松，甚至連舞獅都做埋。早前佛誕，陳山聰跟老死郭政鴻，率領由他們成立的舞獅團隊「獅兄弟」，為筲箕灣區的花炮會演出。
當日戴住黑超的陳山聰負責做鼓手，替準備出場舞獅頭的郭政鴻造勢。龍虎武師出身，有功夫根底的郭政鴻，騎膊馬舞獅頭跳樁演出，無難度。反而形象一向「二世祖」的陳山聰，打完鑼鼓轉位跳上師弟肩膊，同郭政鴻一齊舞獅頭較量，功架居然唔輸蝕。
估唔到陳山聰騎膊馬舞起獅頭，跟有功夫底的郭政鴻一樣身手了得，係威係勢。
打回原形的陳山聰努力翻身，今年初跑馬拉松全馬，雖跑唔贏肯雅徐，但亦以四粒幾鐘完成。
當日二人舉住旗幟出場，而打得又識舞獅的郭政鴻，一手舉起「小師弟」型爆。
籌備展覽兄弟班上陣，加上明星效應，附近睇熱鬧班街坊，個個高舉手機狂影。「政鴻之前有幫台慶同東華籌款舞獅，反而山聰識呢瓣，真係無乜人知。聽講佢啱啱過身嘅老豆當年喺澳門做體育會會長，學過功夫，所以山聰自細跟老豆學過舞獅，只係入咗行之後，無機會俾佢露兩手。」舞獅界人士透露。
據悉「獅兄弟」自今年初正式成立，郭政鴻與陳山聰已多次拍住上公開表演，因身手好加上有知名度，不少公司主動搵上門邀請演出。無線出名人工奀，以為兩兄弟搞「獅兄弟」純粹為賺外快，點知佢哋推job多過接job。
「咁多生意送上門，班朋友都勸政鴻同山聰不如當一盤生意咁做，但佢兩個堅持搞呢壇嘢，係為藝術做推廣，主力響大型活動先出手，例如一年一度花炮會、觀音誕之類，商演、開張唔會接，除非係老友開公司，先會破例幫手。聽講佢哋籌備緊一個關於獅藝嘅展覽，目的係唔想造獅頭呢門藝術失傳，寧願花更多時間做推廣。」知情者說。
重返無線捱騾仔，陳山聰得恩師李添勝關照，接拍新劇《官場浮世繪》，繼續做反派。
當龍虎武師出身的郭政鴻，八五年參加過新秀，同屆有杜德偉同蘇永康。雖然最後入唔到決賽，但他打後空翻檯風令人留下印象。
陳山聰跟何超雲拍拖時，聽曬女友話跟圈中好友斷交，唯獨老死郭政鴻可繼續埋身。之後同超雲玩完，一度潛水的山聰，終在郭的生日蒲頭。
兄弟幫陳山聰、郭政鴻拍住上搵食，有福同享，圈中亦有唔少兄弟幫，夾份搞生意開發另類財路。
曾志偉 苗僑偉
曾志偉跟苗僑偉相識多年，加上二人在娛圈人脈網絡四通八達，去年拍住上開娛樂公司「愛．好娛樂」，簽藝人、投資電影及演唱會，唔熟唔做。
劉威煌 周志文 周志康
「巨聲幫」出身的劉威煌，幕前工作量不多，但勝在有生意頭腦，早前投資七位數開設音樂學校之餘，去年拍住同樣是「巨聲幫」的孖仔周志文、周志康開密室冒險遊戲娛樂場，三兄弟有錢齊齊搵。
撰文、
