郭政鴻曾經因為同滕麗名拍拖時，被揭已有妻有女，令佢形象插水，好在佢前排喺無綫劇《法網狙擊》入面同陳煒上演遊艇激情戲，幫佢攞番唔少分。最後選擇咗同番內地老婆生活嘅郭政鴻，前日下晝3點幾，一家三口去到銅鑼灣維園提早行年宵。
抬足一個鐘
唔知郭政鴻係咪怕俾人認到，見佢戴住口罩同cap帽，仲同兩母女一前一後咁行。佢哋先去咗濕檔睇桃花，見佢睇咗兩檔都冇心水，睇到第三檔佢同檔主有傾有講，仲除埋口罩，最後佢買咗棵差唔多五呎高嘅桃花，買完嘢郭政鴻又戴番口罩，又同囡囡睇玩具。
練武出身嘅郭政鴻唔只身手好，體力都好好，見佢雖然抬住棵桃花都可以行足一個鐘頭，應該唔係想行桃花運啩。其間佢買咗個風車畀囡囡，𠱁得個小朋友好開心。桃花檔老闆之後接受訪問，知道佢係郭政鴻所以畀咗個開心價佢，意頭仲好好㖭。
採訪、攝影：羅德光
揀桃花嘅時候先見郭政鴻除口罩，唔知係咪想聞吓花香。
郭政鴻囡囡揸住個風車玩得不知幾開心。行花巿期間，郭政鴻仲幫囡囡攞住小手袋㖭。
From:
http://hk.apple.nextmedia ... 130207/18158655
