去年簽約無綫的陳煒，可謂過足戲癮，在劇集《法網狙擊》中首次演「奸到出汁」的角色，並有如《本能》中的莎朗史東一樣，淡定得來性感，且會連番肉搏郭政鴻。煒哥坦言之前從未試過的大膽演出，連老公都沒有機會看，所以觀眾今次可算有福。
陳煒與郭政鴻在《法》劇中有不少親熱戲。好相與的陳煒為新劇首次演奸角，而且奸到出汗。
首嘗奸角滋味，陳煒演來起初有點力不從心，劇中名字叫「龐鐵心」可謂人如其名，鐵石心腸。劇中角色與煒哥本人個性剛好相反，她說：「我本身無咩性格又易話為，同衰人兩個字啱啱好極端，所以事前都做咗好多工夫，而且行出嚟畀人感覺又唔可以太奸，但原來係奸到出汁，我都唔知自己演成點，都係等觀眾去評價，好與壞我都接受。」
率先預告浴室大戰
劇中煒哥有不少性感場面，還與郭政鴻有連場親熱戲，除三點式於遊艇上親熱外，她更自爆有場浴室大膽親熱鏡頭，惟電視尺度未知能否播出。她說：「其實我向來都唔覺得自己性感，為咗工作，我絕對配合。（要問老公？）佢好尊重我嘅工作，而且佢好了解我係一個有分寸嘅人，所以完全唔會擔心我，有次我同老公食飯仲撞到戲中同我有親熱戲嘅郭政鴻，我仲同我老公講佢係我男朋友。」
給人性感感覺的陳煒，原來從來不覺自己性感。
煒哥於《法》劇的戲份於明年一月才出街，並笑說甫出場已霸氣十足：「會有少少類似電影《本能》嘅莎朗史東咁，性感形象，但言談間好淡定！」煒哥表示難得奸角已預了被觀眾痛罵。不過，她亦感激監製文偉鴻的賞識：「當日我只係入電視城傾嘢，佢一見到我就話呢個角色好啱我，仲提議無綫簽我，我真係好多謝佢，每個場口都會親自出現監場。」問她可怕被定型做奸角？她說：「我希望演奸都可以有唔同感覺，唔同層次。」
From:
http://orientaldaily.on.cc/cnt/e ...0104/00282_050.html
