原本湯盈盈話囡囡預產期係今個月17號，但可能重咗60磅嘅佢營養好足，囡囡提早一星期喺山頂嘉諾撒醫院出世。錢千金嘴仔嘟嘟、頭髮多多，有曬父母嘅優點，好cute！
娛樂圈又有喜！盈盈樂樂嘅首個愛情結晶品喺週日（10日）出咗世嘞！取名Alyssa（中文名遲啲由爺爺改），重7磅3安士，眼大大、白白淨似足媽咪。
47歲新手老竇錢嘉樂仲入產房幫手剪臍帶，佢笑住話：「原來臍帶好硬㗎！要剪幾次先得。」不過，37歲嘅盈盈其實好犀利，堅持自己生，痛咗兩個鐘就順利生女，嘉樂仔牙擦擦認叻：「佢生嗰時有啲驚，問我會唔會生唔到？我即刻引用拍《逆戰》嗰時，教霆鋒由8樓跳落去嘅一句說話：『唔好諗做唔做到，要諗點樣去做到』！」
譁！講就易囉，計媽咪姐話，盈盈之所以生得快夾妥（醫生都話痛兩個鐘就生都算快㗎！），全因為鬼妹仔性格嘅佢，產前多運動！淨係媽咪姐都撞過佢幾次佗住個超巨肚周圍行街買嘢，仲揸埋車接飲完酒嘅老公㖭。真係愈行愈有氣，差啲健步如飛過做武師嘅嘉樂仔呀！所以呢，各位高齡產婦、想生未生嘅盛女們唔使驚喎，俾啲信心自己。盈盈都話：「今次唔太辛苦，陣痛兩、三個鐘就生，我打算餵埋人奶。」
梗係順其「自然」最好啦，仲唔使同人搶奶粉㖭，叻女！
老竇心聲
週二（12日）晚，嘉樂仔喺微博pose相宣佈囡囡出世，好感恩！跟住火速收到各方前輩好友祝福，而盈盈嘅好姊妹如佘詩曼等猛讚B女似媽咪咁靚。一家三口，人緣so good呀！
譁，真快手，我哋都要加把勁先！（設計對白）
臨生前兩個禮拜之內，媽咪姐試過日頭撞到盈盈挺住巨肚去ifc買嘢，夜晚又揸車去商場接老公。咁行得走得嘅大肚婆真係少見，難怪個個都望多兩眼！
週二（12日）下晝兩點，嘉樂仔陪老婆出院見記者。盈盈好精神，塊面無乜水腫，只係個肚依然凸起，俾嘉樂仔笑：「我懷疑仲有細佬喺裡面，好似未生咁。」
盈盈樂樂朋友多，入院生仔短短幾日，都收到幾大袋禮物，好似劉德華就送咗好多BB衫、BB車同日用品。望嚇張相，淨係氣球都有幾個！
群星賀喜讚唔停
