湯盈盈今年3月為老公錢嘉樂生咗囡囡錢凱晴（Alyssa）後，上個月已經慶祝咗佢第一個母親節，嚟緊星期日輪到嘉樂過首個父親節，但佢大前日已經急不及待一家三口出去食飯慶祝，同行仲有佢老友鄭敬基同經理人Helen㖭。
湯盈盈喺W酒店抱住囡囡Alyssa行嚟行去，睇盈盈個冧樣完全係有女萬事足。
乖女唔扭計
大前晚7點，見湯盈盈抱住3個月大B女喺尖沙嘴W酒店大堂同經理人吹水，吹咗一陣後就行咗入酒店嘅中菜廳開餐，一行七人有講有笑，氣氛好熱鬧。其間盈盈同嘉樂好照顧BB，為怕BB會悶，佢哋輪流抱住BB喺走廊位置行嚟行去，逗BB開心，盈盈仲抱Alyssa行出酒店大堂行幾個圈，又不時望住個女甜笑，一副有女萬事足咁款。Alyssa肥嘟嘟真係好可愛，最難得係酒店大堂嘅音樂雖然好大聲好嘈，但Alyssa依然好乖，全程冇扭計。
啱啱喺星期一足三個月大嘅Alyssa，肥嘟嘟相當可愛。盈盈小心翼翼將囡囡放上車，之後親手幫佢扣好安全帶先開車。
到夜晚8點45分左右，盈盈抱住B女同工人先行離開。問佢係咪提早慶祝父親節，佢笑笑口話：「食吓飯啫，夜啦，BB要返去先。」大約一個鐘頭後，嘉樂搭住鄭敬基同經理人膊頭離開，問佢係咪提早慶祝父親節，佢話：「同老友敍吓舊，同屋企人食吓飯，帶個女出嚟見吓世面吖嘛。」鄭敬基話嘉樂趁機向佢請教做爸爸心得，而嘉樂就話星期日父親節正日會再慶祝喎。
雖然星期日至係父親節，但錢嘉樂同盈盈一家三口大前日已急不及待慶祝。錢嘉樂同鄭敬基（左）及經理人Helen（右）離開時，話要帶個女出嚟見世面。
from:
http://hk.apple.nextmedia.com/entertainment/art/20130614/18296235
