三月就係預產期嘅湯盈盈，上個禮拜六（二十六日）佗住四十二吋巨肚，為新劇《老表，你好嘢！》到將軍澳做宣傳。
大肚婆自爆佗B以來一直冇暈冇嘔冇作悶，因為佗得太舒服，唔排除會繼續生，仲話呢胎會選擇順產，感受吓十級痛母愛咁話。
湯盈盈佗B好輕鬆，反而身邊同事個個好緊張。上樓梯，郭晉安扶到實，就連羅蘭姐同修哥胡楓兩位前輩，都親自擔埋櫈叫佢坐。之但係湯盈盈總係坐唔定，其間劇中藝員玩疊生果遊戲，湯盈盈係都要响前面四圍行，最後要阿Bob出手阻止，大肚婆先肯聽話，唔再四圍走。
怕大肚婆有危險，當日大會只係肯俾湯盈盈玩寫揮春。冇得玩疊生果，湯盈盈居然托住個肚，响遊戲枱前來回跑，好危啫！
羅蘭姐同修哥擔埋櫈叫大肚婆坐低休息吓，湯盈盈堅持唔坐。
