兩年前以王維基為首的城市電訊申請免費電視牌照，廣管局早已完成審批工作，不過行政會議卻遲遲未拍板，令城電一直開台無期。年內，王維基發動高薪挖角攻勢，撬走無綫小生花旦及幕後人員，早前更在城市電訊廿周年晚會中，放風指十月會獲發牌照，但原來只是穩定軍心及向政府施壓的手段。
王維基表面對開台信心十足，但原來他之前曾聯絡亞視，希望租用頻道播放節目，以賺取廣告費，可惜遭亞視拒絕。加上近日林嘉華與唐寧拍攝中的電視劇《警界線》突然停工，令城電不獲發牌傳聞甚囂塵上。昔日背棄無綫的花旦及小生，如張可頤、黃日華及林嘉華等，本來諗住過檔發圍，今次如意算盤打唔響又冇得食回頭草，認真濕滯！
我都唔想㗎噃！（設計對白）
王維基申請免費電視台牌照至今已兩年，一直只等待行政會議拍板。勇字當頭信心十足的王維基，高薪挖走TVB小生花旦及幕後人員，積極拍定劇等開台，然而政府一直採拖字訣，近期不得不謀後路。原來他曾接觸亞視執行董事及顧問王征，希望租用亞視其中一條頻道來為城電播放節目。
頻道年租千萬
其實亞視現時有八條頻道，除了本港台、國際台、亞洲台、中央台及深圳衞視五條頻道外，尚有三條頻道仍未使用，不過王征最終拒絕了王維基要求。知情者說：「好多人同王征傾過租頻道，價錢仲唔錯。其實王維基個價都幾好，雙方合作係雙贏局面，不過王征最後都拒絕咗王維基，可能係因為王維基背景。」
據知王維基開價是每年三千萬租用亞視一條頻道，並每個月以六十至八十萬租用亞視一個廠房作拍攝之用，即是亞視「印印腳」一年就最少收三千萬。「在商言商，亞視收呢筆錢已經夠養晒成個台啦，即使零收視都唔驚。」知情者說。
7月22日，《警界線》開鏡，唐寧、林嘉華、廖安麗、駱應鈞都有撐場。不料拍到中途，近日傳出《警界線》忽然停拍的消息
年初王維基表示會火速成立電視製作中心，可惜建築工程至近日反而有停工跡象。資料圖片
政治因素分歧
早前亞視節目《ATV焦點》被指撐洗腦國民教育，及後長毛（中）亦帶隊去廉署，投訴亞視抹黑選舉。
原來王征拒絕城電，是與王維基早年的言論有關。08年12月，王維基高調與張永霖入主亞視，兩人分別出任行政總裁及主席，王維基以「香港仔」自居，話：「如果亞視要變成國內台，我冇興趣，亞視是一個香港人的電視台。」雖然王維基掌管亞視12天即閃電辭職，但張永霖承認王維基的辭職是與雙方處事作風有「嚴重分歧」。王征有濃厚的中資背景，近年亞視愈來愈似中央台，故這方面若未能得到共識，雙方絕對合作不成。
遲遲未能開台，加上租亞視頻道失敗，城電雪上加霜。近日城電位於將軍澳的地盤停工，由林嘉華與唐寧主演、拍攝中的電視劇《警界線》亦突然停工，令人懷疑王維基電視夢再度出現變數。
本刊致電亞視，亞視公關部經理Constance說：「有關與王維基的合作談判已經終止，目前我們與王維基沒有任何合作計劃。」
城電傳訊助理Jessie說：「老闆（指王維基）希望明年二月開到台。（是否傾過租亞視頻道？）有傾過租廠，有去睇過，之後覺得唔啱所以冇再傾。」
唐寧：去邊度拍都得
《天梯》播映前，張可頤曾主動表示可以幫娘家做宣傳，但最後她都是被飛出所有宣傳活動。城電若開唔成台，張可頤喺香港真係可能冇劇可拍。
城電同亞視合作不成，早前高調由TVB過檔城電的演員自然大鑊。相比之下，張可頤與城電只係簽部頭約，都未係最慘，至於黃日華、艾威等一班已簽約城電做「親生仔」的演員，如果城電真係開唔到台，他們就有可能被「賣豬仔」，被指派出去接job。
被問到城電攞唔到牌照，唐寧說：「真喺唔知道（指租頻道），唔喺我層面嘅嘢，干涉唔到，我都喺做好自己本份，（驚唔驚開唔到台？）我係自由身，劇本適合去邊度拍都得嘅。」張可頤黃日華，則於截稿前未回覆。
租頻道有前科
《娛樂CIA》由盧覓雪（右）、董敏莉、楊思敏（蝦頭）等主持，因為有爆料環節揭娛圈秘聞，加上邀請到明星現身，是近日亞視較為人知的節目。
租頻道看似天方夜譚，不過亞視其實已經做緊類似動作。好似本港台及亞洲台逢星期一至日晚上播出的《娛樂CIA》，其實就是由「傳訊媒體」自行製作，並向亞視租該時段的播映權，即是亞視租出該段air time，而該時段的廣告收益則歸於「傳訊媒體」。
《娛樂CIA》八月初播出，其中的爆料環節更因曾暗示方力申及Stephy兩年前結婚及近日已離婚，令節目成為少數亞視播出的人氣節目，廣告費自然亦水漲船高。
