行過街頭巷尾，最多人在討論的劇集是港視播映的《來生不做香港人》，說實在的確有點意想不到，最意想不到的是幾位主角入血入骨的演出，令觀眾再次有咬牙切齒的煲劇肉緊感覺。至今仍然單身一人的張可頤飾演恃勢凌人的An霸與內地接軌，與高皓正飾演的內地人張泰萊過電，現實中的她也投入角色直言不介意找個內地男友，甚至明言：「上海朋友話介紹富二代我識。」
撰文：嵐山
張可頤在《來生不做香港人》飾演從內地來港的細妹Anson，其港女自私、控制慾強、強悍自立的女強人個性鮮明，在劇中被下屬改花名做An霸，就連觀眾也懷疑她本人就是這個模樣，更擔心她是因為個性刻薄而至今仍然孤身一人。
張可頤於《來生不做香港人》中與高皓正擦出愛火花，同時又難捨飾演Hill少的潘燦良（右圖）。劇照
張可頤自爆拍攝期間An霸上身，曾當眾鬧爆臨記。資料圖片
An霸上身鬧上癮
能令觀眾投入至此，張可頤大讚編審鮑偉聰和總導演陸天華功不可沒。據悉可頤曾擔心An霸太乞人憎，一度拒演，全靠兩位《來生》大腦落足嘴頭，才令她回心轉意豁出去挑戰自己，「感謝劇本寫得咁好，我真係一粒字都冇改，跟住做就能切切實實將港女形象凸顯出嚟。我今次亦無掩飾或美化An霸，其實係幾乞人憎，記得鬧下屬串錯字嗰場戲，好多朋友都打番電話嚟話『我老細都係咁』，聽到心裡滿足感好大。」
可頤自己也全身投入An霸的角色，拍攝近半年更因為太投入，曾An霸入血難以抽離，她說：「我哋返東莞拍咗近兩個月，有一晚大家拍到凌晨兩點幾，我都唔知自己係梁美行定張可頤，竟然入咗血，拍女侍應拎茶入嚟一場戲，點知佢成隻杯打爛曬，枱布濕埋。個女仔又拎個盤埋嚟take two，我好竧𣉢話『你死㗎！你唔識拎個盤過隔籬張枱練好先拎過嚟？得一張枱布咋，係咪唔使收工呀？』全場僵曬，因為唔係對白，高皓正好愕然問我做乜咁冇禮貌，我先醒一醒，我話邊個呀？」可頤稱之後有向侍應生講唔好意思，還緊張地解釋，續說：「我叫高皓正做證，我平時唔係咁，但嗰刻真係上咗身，流利、霸道到同An霸一模一樣。」
那些年的張可頤索到爆人見人愛，估不到如今扮演尖酸的An霸同樣無難度。資料圖片
四口姐真人相助
是否從影以來最滿意劇集？可頤說：「應該係話最有意思一部，編劇兩年前籌備，但𠵱家播出就好應景，反映社會問題，帶畀觀眾好多正面聯想。」毫無疑問，《來生》令大家有好多反思，沒有偏幫中港任何一方，可頤亦讚內地人有情有義：「我試過抽離角色去睇，其實拍攝過程真實嘅大妹好好人，我哋去到東莞人生路不熟，佢幫我哋疏通各樣嘢，有場戲需要好多車，四口姐就叫身邊朋友借寶馬等名車撐場，仲借出豪宅分毫不收，感受到人情關係好濃烈，係香港人冇。」
劇中可頤接受「鄉下佬」高皓正的愛，現實中可頤亦不拒抗，她說：「上海都有朋友話介紹富二代我識，叫我唔好睇少富二代，話個個都喺外國讀完幾個學位，或幫屋企做大生意，文化修養分分鐘比香港好，但發展都要坐定定，先可以瞭解多啲。」
from:
http://hk.apple.nextmedia ... 150103/18989514
