蘇永康、張可頤、謝雪心等，前晚喺灣仔君悅酒店出席「華彩耀聯合慈善晚宴」。
張可頤身穿紅色旗袍現身，佢話配合大會用中式主題，顯出中國人大愛美德。問佢幾耐冇着旗袍？張可頤表示：「如果着旗袍出席活動，真係第一次。之前拍劇拍電影都試過。（鍾意嘛？）老實講，以前真係唔識欣賞，0依家真係好有味道，顯出中國女人嘅靚，0依家好想搵裁縫做旗袍。」
張可頤又謂聖誕節將留港，因為有啲工作及私人嘢做，年底有幾日行開下，可以同朋友去度假。問到明年工作安排？張可頤表示內地工作比較多，有幾個劇本及Project斟洽中。
講到佢同張兆輝合作拍嘅內地劇收視唔錯，佢話：「係呀，第一次同輝哥合作，成個劇組得我同佢香港人，所以特別投契，而輝嫂又成日嚟探班，有好嘢食。」
問佢嚟緊再拍內地劇，有冇香港演員演出？張可頤謂：「選角仍籌備中，不過內地劇多限制，香港人及台灣人數都有限住。（好多韓星拍內地劇，想合作嘛？）我試咗再話你知。」
from:
http://hk.apple.nextmedia ... 151211/19408070
