張可頤喺03年11月19日嘅台慶頒獎禮攞視后。
楊怡憑《名媛望族》鼻頂松哥頂埋個視后返屋企，搞到坐定粒六嘅徐子珊面黑黑。查實年年頒獎禮大把是非，03年嗰屆火藥味仲濃。
話說嗰年視后個獎鬥得好激烈，未完場都唔好慶祝住，最後張可頤憑《九五至尊》飾演呂四娘，擊敗同年勁敵宣萱、佘詩曼同郭可盈封視后，終於一圓多年心願。不過可頤攞獎即刻囂士上身，一上台就嚟料話：「唔好cut我機，我仲有好多嘢要講，呢個獎我恨咗好耐。」當晚可頤又四圍辣火頭，先係阿佘講嘢嗰陣，被影到嘴藐藐，跟住又寸可盈冇代表作。事後可盈梗係唔忍佢啦，一嘢寸番佢轉頭：「可能佢（張可頤）攞獎經驗少，其實有冇代表作唔係由佢講。好似打麻雀，實有輸贏，如果牌品差，以後就冇人肯同佢玩。」可頤由最佳女主角，變成最乞人憎女主角。
事隔多年，阿佘身價非同日而語，家陣北上拍劇搵真銀，呢啲豆泥獎一啲都唔希罕。至於可頤亦都轉投王維基門下，有冇得好似以前咁風光，都要視乎個台開唔開得成先囉！
From:
http://hk.apple.nextmedia ... 121222/18109847
