雖然梁特首以「複雜到不得了」嚟形容政府唔知係咪應該再發免費電視牌照，但王維基揸旗嘅香港電視，就繼續馬照跑，劇照拍。
張可頤擔正做女主角嘅新劇《客家女人》，早排响九龍塘一間婚紗店拍婚禮場面，劇情講新郎逃婚失蹤，搞到佢嫁唔出。講起幫王維基打工，張可頤一再賣口乖，話新公司福利好，休息時間又足，平均每日只係開工八個鐘，最長都唔過十二個鐘，諗番响無綫拍劇，日夜顛倒冇覺好瞓，佢忍唔住話：「我年紀大，如果再留喺TVB，真係會死㗎！」
張可頤話拍完《客家女人》會休息一排先，幾時開工拍咩劇返大陸抑或留响香港，通通可以自己話事。發球權响自己手，幾時都着數啲！
劇中飾演硬朗港女嘅張可頤，知道未來老公逃婚，嬲到走出街，飾演佢家姐嘅劉美君，跟實細妹叫佢冷靜。
飾演兩公婆嘅劉美君曾偉權，休息期間排排坐食瓜子。香港電視用嚟拍劇嘅超高清攝錄機，據講要成千萬一部，歐美國家都採用，香港就得王維基肯俾錢買！
