過氣亞視女優李綺雯（o靚妹）上星期因為同效力南華嘅香港首席射手陳肇麒（陳七）激咀相曝光，俾人踢爆發展姊弟戀，不過呢段情真係好化學，o靚妹認完拍拖冇幾耐又話分咗手，陳七就話同o靚妹喺8月分手，10月底先翻撻舊愛Natalie，o靚妹親口證實佢哋sweet到爆嘅澳門預支蜜月之旅，就係喺8月29日發生。
噚日o靚妹喺電話度話陳七擘大眼講大話，堅稱佢哋嗰陣時未分手，問佢當中可覺有第三者？佢話：「其實係囉，細節嘅嘢唔想再提啦。」之後o靚妹滿懷心事出席無綫劇《OnlyYou只有您》喺電視城搞嘅開鏡拜神儀式，問佢同陳七仲係咪朋友？佢苦住面口話：「我唔識點講，總之唔係敵人，但係冇必要聯絡，佢都有自己難做嘅地方，當時唔講戀情係唔想炒作啲新聞出嚟，開心就話啫，我唔想由我去講邊個啱邊個唔啱，我唔係一個好識講嘢嘅人，唔想講多錯多。」
