無綫劇集《情越海岸線》收視幾理想，前晚嗰集收視仲高達30點（約193萬觀眾）。噚日李詩韻、朱璇、李綺雯（o靚妹）同劉俐成班演員，去咗西貢嘅海鮮酒家玩捉魚蝦蟹遊戲，因為天氣好熱，李詩韻着晒短褲、闊領衫，大晒香肩，加埋着背心嘅朱璇同吊帶衫嘅o靚妹，令活動充滿生氣，唯一冇厘神氣嘅係是非纏身嘅劉俐，啱啱又俾人話佢啪藥入院。
另一女主角陳茵媺放假，要靠李詩韻嘅大跌膊增加宣傳之效。李詩韻以前打波時撞到鼻骨有折，佢話怕會變樣唔敢整容。
劉俐經痛入院
劉俐解釋話：「我冇事，係因為經期比較氣虛，講嘢冇乜力，又好易有腸胃炎，今次係腸胃炎加經痛再加胃痛，朋友叫我入院。」但講到你自殺咁喎？劉俐話：「記者都冇問我，我只係食胃藥同止痛藥，食兩粒唔好再食多粒，咁講我唔開心，怕影響屋企人，好在佢哋對我百分百信任、支持。」劉俐話會保留法律追究權利，不過始終想息事寧人。
李詩韻玩遊戲贏咗，得到黃浩然獻吻，真係輸咗好過咯！（左起）李綺雯、姚子羚、朱璇同劉俐都換上吊帶裙、吊帶背心同短褲仔，令活動充滿生氣。
女主角李詩韻同樣惹是非，俾人話佢整過個鼻，詩韻話：「啲舊相係年幾、兩年前，話我整個旺夫鼻，我同屋企人個鼻都高，以前打籃球食過波餅，鼻樑有折，呢啲新聞當宣傳啦！」詩韻又話唔抗拒整容，承認自己個樣有缺憾，但怕整錯咗返唔到轉頭，所以唔會諗。
另外，曾同小說家亦舒拍過拖嘅岳華，被問到亦舒唔認親生仔時話：「我哋一齊好短時間，唔知佢嘅事，只係早年喺加拿大商場碰見過，成40年冇見。」岳華話記者知亦舒嘅嘢比佢多，人哋嘅家事由得佢自己處理。
from:
http://hk.apple.nextmedia.com/entertainment/art/20130529/18275132
