馬國明及李詩韻這對金童玉女一直合作無間，先後在多套劇集扮演情侶，而最近更在無線劇《寒山潛龍》再續前緣，雖然火花不斷，戲裡戲外都話題多多，但兩人都異口同聲強調從未過電，又指不心急拍拖，更在訪問中互爆不少秘密！
馬國明與李詩韻已多番合作，五度演情侶。
一見鍾情
在《寒山潛龍》再度合作的馬明及詩韻已經五度做螢幕情侶，早在2004年時拍攝無線劇《本草藥王》正式合作，原來首次邂逅雙方已經有好印象，詩韻更大爆馬明幾度「愛上」自己！
馬：開頭覺得佢好靚女囉，同埋嬌小玲瓏，我鍾意啲細細粒嘅女仔。我覺得佢好適合拍古裝，唔係話佢時裝唔靚呀嚇。
李詩韻與馬國明緣分始於2004年合演《本草藥王》。
李詩韻與馬國明於無線熱播的《寒山潛龍》再度合作。
李：佢嗰時就冇依家咁口花花，好靜，但佢係一個好熱心工作嘅男仔。我第一日識佢已經覺得佢好捱得。依家就開朗咗，識得講笑，就撩嚇女仔、攬嚇男仔。
馬明被李詩韻踢爆經常要求追加咀戲。
馬明與李詩韻劇內相戀，但劇外卻唔過電。
李詩韻不介意照顧男友，去旅行負責蒐集資料。
馬：你依家都分別好大，依家好戲好多，好畀心機去諗套劇點樣出嚟會好啲。有時幫我諗埋嘢，變咗我唔使諗咁多嘢。
馬明與李詩韻心靈相通，默契十足。
李詩韻愛尋找刺激，早前到馬爾代夫潛水。
李：第一套古裝嗰時佢同我講佢好鍾意我個角色，今時今日《寒山潛龍》佢又話愛上咗我個角色！
馬：佢好多角色我都好鍾意，《鐵馬尋橋》嗰個我又好鍾意！
李：但現實就撻唔著，不過撻唔撻得著都係要睇嚇timing，你可以識個人十年都撻唔著，但無端端撻得著。
馬：可能大家都唔係好急搵另一半，就冇令件事發生。
口花撩咀
貴為一線小生的馬明出名口花花，但詩韻就對於「日日求咀戲」見怪不怪，馬明則反指詩韻講過唔算數，兩人互數對方「吹水唔抹嘴」。
李：佢套套都話要加咀戲，我都慣咗呢樣嘢，我唔覺得係咩一回事。
馬：加到咪加囉！
李：佢同導演講「呢場要咀」，我聽咗呢句對白幾百次，已經冇曬反應。
馬：我諗我係《鐵馬尋橋》嗰時變成咁，因為之前畀羅嘉良點醒咗，佢話一個男主角要令拍攝嘅環境開心。
李：所以你做咗一線小生就口花花嘞！
馬：我唔係淨係對後生靚女口花花嘅，我對住GiGi姐（黃淑儀）都口花花。
李：唔止係前輩級人馬，佢對住服裝、化妝、梳頭都係咁口花！
馬：你夠話介紹女仔畀我識啦，得個講字。
李：你諗嚇點樣同佢撻著吖？我淨係搵佢話有個單身女仔好鍾意佢，叫佢識嚇個女仔，但後尾都冇出過嚟。
馬：佢依家都有男朋友啦，不過你都好多friend，有機會嘅話再介紹嚇啦！我都想介紹男仔畀佢識，但係我識嘅好多都結咗婚，一係就拍緊拖。
合拍談情
目前專注事業的馬明和詩韻，決心將感情放埋一邊，但其實對未來對象亦充滿幻想，馬明想女友為他打點一切，而詩韻就不介意幫男友計劃將來，難道暗示早前的「五年之約」所言非虛？
馬：我好驚煩，最好女朋友幫我搞掂曬。
李：係唔係著咩衫都幫你諗埋先？
馬：係呀，食乜飯都要諗埋，我淨係畀心機搵錢畀佢使就得，但詩韻就一定頂唔順。
李：唔係喎，我一定要organize嘅，我去旅行都做定曬資料蒐集，所以個男仔要我幫佢plan，我都唔介意。
馬：咁我都有plan嘅，但要我日日諗去唔同餐廳食飯就有難度囉，諗落我真係幾冇情趣。
嫌棄筍盤
在「筍盤榜」名列前茅的馬明一直都是女性朝思暮想的對象，事業有成之餘又孝順父母，但在詩韻眼中卻未達滿分，更直言跟馬明好難撻得著！
李：佢梗係一個筍盤啦！
馬：咁TVB都好多筍盤嘅，係單身嘅都係筍盤。
李：不過我同工作上識嘅男仔好難撻得著，我好focus工作，冇咩機會好深入認識，馬明又難約。但當佢係對象我會畀90分，佢太靜態喇，我鍾意做刺激嘢。
馬：我就畀夠100分詩韻嘞，佢好有古典美又顧家！
李：係咪即係你鍾意古人同恐龍？
後記：百分百啱Feel
馬明和詩韻雖然撻極都撻唔著，但非常合拍，加上近日四出宣傳，攝影師未開口就自動埋位，又互相執好對方甫士。問到是否想再次合作？兩人都爭住答「想」，形容他們是公仔箱裡最襯螢幕情侶亦不為過。
馬：馬國明
李：李詩韻
筆錄：宇翔
攝影：嚴偉國
馬國明服裝：Sandro
李詩韻
服裝：Bread & Butter
髮型：Jay＠Hair
From:
http://orientaldaily.on.c ... /00282_032.html
