馬國明，之前同過曾華倩、胡定欣傳緋聞、拍拖，現時女友係黃心穎。
不過比起以上女友，馬明原來至愛竟然係……唐老鴨。
自稱屋企有過萬件唐老鴨珍藏嘅馬明，7年前為J2台嘅節目《兄弟幫》做嘉賓，當時主持除咗有林盛斌（Bob）外，仲有未喺大陸走紅嘅「的士陳」陳偉霆。馬明當日帶咗部份珍藏上節目。昨日有網民就舊事重提，講起馬明沉迷唐老鴨嘅程度，個個都話不可思議。
馬明話：「幾歲大就俾阿媽『導』咗我鍾意唐老鴨，當時佢去日本旅行，買咗隻唐老鴨毛公仔俾我，自此就中咗毒，不能自拔……以前細個會攬實個公仔同佢傾偈，到o依家，全家人都仲係咁鍾意唐老鴨，唔係講笑，每年唐老鴨生日，我哋全家都會同佢慶祝，阿媽會買定生日蛋糕攬住隻公仔，同佢一齊切。佢真係當佢孫咁㗎，會買啲BB仔衫俾佢換，又會織冷衫俾佢着。」呢個時候，主持阿Bob同的士陳已經笑到反艇，笑到氣咳嘅的士陳，仲話需要冷靜一下。
仲未止，馬明繼續好純真咁講：「有次我老竇想坐梳化，咁唐老鴨本身有個專屬位睇電視，老竇就行埋去同佢講『可唔可以借個位俾我呀』，咁我哋咪拎開隻公仔囉。」
跟住阿Bob就講笑問：「即係唐老鴨喺你哋屋企係好大地位囉喎，咁譬如你哋去飲，會唔會帶埋隻公仔去？」馬明開頭答唔會，點知後面嗰句先精彩。「唔會帶大嗰隻，會帶細嗰隻囉。」
Bob又問佢係咪唔會食鴨，馬明就答：「盡量唔食啦，唔係講笑，都真係因為係唐老鴨嘅關係。」
再問到女友如果唔鍾意鴨，二取其一，會揀邊個，馬明繼續真情流露：「咁好大機會會揀唐老鴨……」
心穎BB，多口問句，你鍾唔鍾意鴨㗎？
from:
http://hk.apple.nextmedia ... 170928/20166885
