呢個係有關於「陳七」陳肇麒嘅故事，o靚妹李綺雯係陳七前度，組合MVG成員劉雅婷Toby係女朋友，唔係，係未婚妻至啱，聽聞仲係大肚嗰隻，不過都係嗰句，因為陳七花弗多女，留低唔少手尾。
事發係年初Toby先後兩次同o靚妹冤家路窄，其中一次去朋友婚禮，Toby知道o靚妹李綺雯同老公陳七有聯絡，於是借醉行去o靚妹身邊狂爆粗，又扮企唔穩撞佢，仲大聲講咗句「臭X」，當時o靚妹嚇到呆一呆然後睥實Toby，好彩現場有人拉實Toby，先冇搞大件事。
前晚o靚妹喺九展出席電影《終極勝利》首映禮，重提被撞俾人爆粗鬧嗰單嘢，佢個樣好無奈咁笑：「好難答你喎！過咗去就唔好再講。」
咁係咪有發生呢件事發生先？o靚妹話：「過咗去囉！」有冇嚇親先？「第一下係有啲。」咁同陳七係咪仲有聯絡？o靚妹話：「唔好幻想太多，大家都唔好幻想，過咗咁耐唔想去回應。」咁睇陳七未婚妻係放唔低？o靚妹勸大家都要放低，佢話：「唔好再講太多，我哋應該要開心啲。」之後再問佢係咪有同陳七聯絡？佢就話：「冇呀！冇聯絡。」
有傳o靚妹o依家同知名動作導演吳永倫拍拖，但係問佢係咪拍緊拖？佢話：「都唔講喇！單身唔代表咩，拍拖又唔代表咩。」咁講法，係咪好穩定？佢又話：「邊個會知。」再問佢異地戀好難維繫？佢好似若有所指咁話：「邊個會知呀！就算喺香港拍拖維繫得好唔好邊個會知，邊個會知道香港拍拖感情會好呀！(仲講咗六次『邊個知』)。」記者問佢咁點解要重複4次咁多，佢話：「重要事嘛！」又係例牌咁會唔會祝福陳七？佢話：「個個都祝福，我都祝福你㗎！」真係句句有骨，仲要落地！
from:
http://hk.apple.nextmedia ... 160614/19653708
