𡃁妹李綺雯收胸買被亞視出身嘅李綺雯（𡃁妹），06年轉投無綫，本來知名度唔太高，演出嘅機會自然唔多。所以佢趁住同無綫嘅經理人合約啱啱滿咗，依家除咗喺幕前做吓主持、拍吓劇外，仲有做marketing同公關嘅工作，有晒打算！其實最近𡃁妹喺《仁心解碼Ⅱ》入面演變態女殺手，都幾多人讚賞㗎！
不過咁，講好睇，點都唔及佢喺依家播緊嘅《情越海岸線》入面，逼爆32B事業線色誘沈震軒！佢仲即刻成為新一代宅男女神㖭。但上星期𡃁妹出席活動，胸部已經好似變幻球咁打回原形，之後媽咪姐仲發現佢單拖行傢俬舖，見佢拎住把軟尺左度右度非常入神。咦，佢主力睇雙人被鋪同家品，唔通最近搬咗屋嘅𡃁妹準備同圈外男友建立2人小家庭？都啱，娛樂圈今日唔知聽日事，搵到真愛梗要攬住啦！
當日完咗活動，𡃁妹着番件粉紅透視外套行傢俬舖，媽咪姐見佢喺牀上用品部揀足半個鐘，仲主打睇雙人牀鋪。
揀完一輪家品，𡃁妹就去咗買急凍三文魚。睇下男職員嘅視線，果然做咗女神喎！
李綺雯為無綫節目《極地狂奔》宣傳擔任司儀，穿着小背心嘅𡃁妹已經由《情越》嘅奇幻事業線（左圖）變番平平無奇，似乎黃德斌個胸肌仲大𡃁妹啲啲喎！
