涉嫌醉駕官司仲排緊期，湯盈盈早兩星期仲一個人去中環IFC 行街，佢喺書店買咗本減肥書《48 hours detox 》，呢排冇工開，減吓肥都好嘅！
上年年尾湯盈盈涉嫌醉酒駕駛傷人被捕，點知案件未開審，就發生年廿八貨車司機涉嫌醉駕撞死六個人意外，搞到死者家屬向特首曾蔭權哭訴要求嚴打酒後駕駛。之後媽咪姐聽到傳聞，話盈盈睇完新聞後非常擔心，所以搵好友曾志偉主動出面，游說身為道路安全議會宣傳運動委員會主席嘅余錦基，同埋仁濟醫院董事局副主席吳守基為盈盈寫求情信，吳守基仲係太平紳士
！
湯盈盈同曾志偉份屬好友，據說志偉正努力幫盈盈搵知名人士寫求情信。
不過奇就奇在，余錦基上星期仲有份同運輸及房屋局局長鄭汝樺開會，研究按司機醉酒程度實施不同級別嘅刑罰，飲酒愈多刑罰愈重。如果佢真係幫湯盈盈寫求情信，似乎同佢身份有嘅矛盾！星期二媽咪姐打俾余錦基八吓，余錦基就話：「我知道湯盈盈醉駕呢件事，不過志偉冇搵我寫求情信。」而湯盈盈就回應：「我唔想再講單官司。」至於曾志偉，佢聽完媽咪姐問佢係咪幫盈盈搵人寫求情信，就即刻cut 線，好離奇。
吳守基
余錦基
有傳湯盈盈搵到身兼公益金籌募主席余錦基同吳守基太平紳士為佢寫求情信，希望減輕涉嫌醉駕懲罰。
