舒淇着開窿裙行紅地毯，大方高貴。
【澳門直擊】第十屆亞洲電影大獎頒獎禮昨晚在澳門威尼斯人酒店舉行，太陽娛樂老闆周焯華（洗米華）、舒淇、羅霖偕兒子、甄子丹胞妹甄子青、張敬軒、王菀之、白只、春夏、翁子光、梁詠琪、柯震東、劉亞仁、賈樟柯和趙濤等，於下午5時開始行紅地毯，杜琪峯、法國女星蘇菲瑪素（Sophie Marceau）和高圓圓約晚上8時才出場，而李秉憲壓軸行紅地毯，星光熠熠，當中韓國女星李成敏及莊端兒則性感示人，問超低胸的莊端兒會否擔心走光？她表示：「都驚㗎！因為入面只係貼乳貼，乜都冇，男友（張智恒）睇過我套衫，佢話冇眼睇！」
性感現身的莊端兒指男友張智恒表示冇眼睇。
孕味甚濃的王菀之要由軒仔扶住出場。
王菀之要軒仔扶
舒淇憑電影《刺客聶隱娘》有份角逐影后，她穿上開窿透視長裙行紅毯，性感又高貴，她表示：「《聶隱娘》𠵱家喺法國上映，剪咗另一預告片，另一個感覺。」舒淇近日趕拍電影《健忘村》，當中要扮村姑及素顏出鏡。
軒仔與王菀之手拖手到場，婚後的王菀之明顯身形圓潤，孕味甚濃，要軒仔扶着她出場，問到是否有喜訊時，王菀之否認說：「唔係！只不過過年時食多咗糕點，生仔係好正常事，但呢啲冇得急，要順其自然。」
梁詠琪笑言榮升媽媽後不會穿着太性感。
春夏蹺着拍檔白只示人。
梁詠琪唔再性感
穿黑色晚裝的梁詠琪就擔任頒獎嘉賓，記者指她着得密實時，她哈哈笑說：「係呀，做咗媽咪就要以身作則，唔可以咁性感啦。」近日她留在澳門拍電影《骨妹》，但因為掛念女兒，有時收工會搭夜船回港，到翌日朝早才會搭早船回澳門開工。
白只憑《踏血尋梅》獲最佳男配角提名，他表示：「今次有幸出席盛大頒獎禮，心情相當緊張。」他卻被旁邊的翁子光爆料：「原來佢係淺野忠信粉絲！我話畀佢聽今晚有可能有機會見到偶像。」白只點頭承認說：「如果一陣真係見到佢，我會企喺一邊，默默支持佢。」
採訪：張俊銘、卓寶花
攝影：陳俊強
from:
http://hk.apple.nextmedia.com/entertainment/art/20160318/19534211
