陳豪昨日出席活動，經理人嘉莉仍貼身侍候。
陳豪與陳茵媺宣佈愛情結晶品「小Mo子」出世，小Mo子腳頭很好，大旺父母事業運，出名愛妻號的陳豪乘勢大賺奶粉錢，好讓妻兒過更好的生活。00年加入無綫的陳豪，雖然是經理人合約，但人工奀兼自由度不大，加上其經理人陳嘉莉早前向無綫辭職，難怪下月便約滿無綫的陳豪遲遲未動筆簽新約。
早前已傳出有奶粉商有意出價100萬力邀拍廣告，也有纖體商出價150萬邀陳茵媺與囝囝拍收身廣告。自陳豪宣佈即將做爸爸後，據知夫妻檔酬金高達50萬，而陳豪10月出席汽車活動，現身僅20分鐘便有約20萬袋袋平安，計起來1分鐘1萬元，分秒值千金，為着妻兒，他當然不介意離開娘家！
陳豪及陳茵媺宣佈升呢做父母，愛妻號陳豪發憤搵奶粉錢，讓妻兒過更好生活。
梁家樹自立門戶
至於自73年加入無綫的製作部總監梁家樹（Tommy），4個月前已向無綫請辭，明年2月正式離職。雖然無綫再三挽留，但他去意堅決，年過60歲退休之齡的他，希望自立門戶開製作公司，據悉得到不少富豪好友支持。不過離職後，他會完成無綫5月與寰亞合作開拍的《衝上雲霄》電影版。記者昨致電向梁家樹求證，但他表示沒回應。
全城熱話--張可頤：天作之合必出佳品
陳豪（Mo）與陳茵媺（Aimee）向來在圈中人緣甚廣，二人昨日凌晨在微博宣佈誕下「小Mo子」後，全城祝賀「雙陳添丁」，不少藝人更在微博留言祝賀，一片喜氣洋洋！
另外，Aimee的好姊妹戚黛黛及朱凱婷更第一時間接到通知，至於曾與陳豪及茵媺合作拍劇集《天梯》的張可頤、有生BB經驗的徐淑敏等，昨日亦紛紛在電話中送上祝福，祝願這一家三口健康快樂、開開心心。
採訪：嵐山、比華利
戚黛黛：
「我、朱凱婷等人同Aimee有個group chat，早一晚已知Aimee入院，成個過程update晒。可能因為我哋太煩，生咗第一時間，阿Mo代老婆覆我哋話母子平安。原本我哋下周會搞迎嬰派對，𠵱家早咗少少出世，會買多少少BB衫。暫時唔會探Aimee住，因為佢餵人奶，等佢休息多啲。」
曹敏莉：
「BB好標致，我囝囝大佢哋BB兩個月，將來可以一齊玩。我諗咗買BB用品做禮物，祝Aimee一家開開心心，BB健健康康。」
張可頤：
「梗係恭喜，一索得男，佢哋係天作之合，必出佳品，BB一定靚仔又乖巧。傳阿Mo離開無綫？可能扭吓計箒！好男人要賺奶粉錢，梗係要勤力啲。我都期望再同阿Mo合作，上次演姊弟戀，下次演母子戀都好。」
歐陽震華：
「睇陳茵媺個樣就知旺父益子，希望佢哋生多幾個。等我返嚟請佢哋食飯，希望BB百日宴時又請我食番餐。」
戚其義：
「好多人託我送BB嘢畀佢。我唔會認佢個仔做契仔，因為責任好大，我自己都係大細路，叫佢個仔認我做契仔會好啲。」
徐淑敏：
「BB鼻高高，好靚仔。我畀鄰居Aimee貼士係保持開心，坐月時要休息多啲。Aimee如果想追囡囡，最快要唞9個月，希望佢哋囝囝大啲過嚟同我兩個囡囡玩。」
向海嵐：
「早兩日喺街見過Aimee，當時佢幾精靈，隔一日就生咗都好surprise！有傳短訊問候佢，希望佢哋快啲生多個。Can't wait to meet the little prince（好想快啲見小王子）！」
羅敏莊：
「我個囡囡出世Aimee有送禮物，我點都會揀啲禮物送畀BB，我諗都係送被仔、衫仔或禮券。上次同陳豪出活動，佢猛問我湊B貼士。」
徐子珊：
「噚晚見朋友轉發呢個消息，喺呢度恭喜佢哋，好戥佢哋開心，係一個好靚結局。」
陳敏之：
「想快啲去探佢，但都係等佢坐完月同休息夠先。」
龔嘉欣︰
「BB生日咪係同我爭一日？𠵱家佢都要休息，晏啲先會傳短訊恭喜佢哋。」
蔡少芬：
「哇……太開心了！恭喜晒啊！想咀BB啊！媽媽……你辛苦啦！爸爸……你真幸福。」
麥長青：
「恭喜！恭喜！祝BB快高長大！健康愉快！幸福美滿！」
鍾嘉欣：
「The sweetest thing（最甜美的事）！」
楊怡：
「Aimee,so proud of u（以你為傲）！」
陳法蓉：
「沒想到前日才見過你，今日就有超好消息！BB超靚」
朱凱婷：
「Welcome to motherhood and please enjoy this miracle journey（歡迎做媽咪，享受奇妙旅程）！」
周家怡：
「That's so touching（好感人）！」
周麗淇：
「Congratulations Aimee and Mo（恭喜）！」
李綺雯：
「祝你們一家幸福美滿。」
張嘉兒﹕
「Congrats,we were going to do the baby shower n（and）house warming next week...guess little mo is getting impatient.（我哋下周會有BB花灑會同暖屋活動，估計小Mo都心急。）」
from:
http://hk.apple.nextmedia ... 131206/18538526
