前排無綫俾通訊局罰咗90萬，指其「以相當低成本囤積藝人」，之後TVB發聲明話藝人合約唔存在「不可使用廣東話」嘅條款喎。而05年香港小姐、前無綫藝員，家陣做咗人民力量主席嘅袁彌明，早前想為歌手藝人討回公道，聲大大指無綫講大話：「我知係無寫喺合約入面，但唱片公司負責人都知，建議政府收番佢哋（無綫）個牌！」當日袁彌明同TVB因合約問題不歡而散，今次呢單又係關合約事，當然會挑起佢條筋。
一心以為袁彌明做咗主席後，更加敢言啦，點知臨埋門先脫腳。
08年，袁彌明好勇，單挑無綫，依家就……
佢仲約好晒記者，話周一（7日）要大爆當年合約不為人知嘅事，點知在訪問前一個鐘忽然話一切取消，解釋話諮詢咗律師意見，合約內容要保密喎！阿袁主席，做得一黨之首，下次講嘢前，諗真啲啦。
前TVB藝人有嘢講……
林嘉華
早幾年前，林嘉華都係無綫藝人，佢好老實咁承認自己當日嘅合約係無寫明唔講得廣東話，但就咁話：合約精神，人哋開出條件，就睇你願唔願意接受啫。今次整件事（罰款）出咗嚟，原來（無綫）係唔啱規矩；呢件事上得到嘅啟示係，如果要香港娛樂圈發光發亮，一定要多平台先得！
唐寧
唐寧由TVB轉投王維基嘅香港電視，佢暗示依家工作方便過喺娘家無綫：同香港電視拍嘅《歲月流情》啱啱完咗，雖然未知啲劇集會幾時播，但有自由度對大家都好，我可以一直喺呢個電視台工作，而又可以接外邊嘅job。
能夠做到雙贏嘅，應該就唔會俾人罰錢啦！
