男神王宗堯日前喺facebook貼咗攬女相，仲留言話好需要情深抱抱，相中只見長髮女背影，令粉絲妒忌爆燈，爭住向男神索抱。馮仁昭起底查獲王宗堯攬實嘅竟然係人妻袁彌明（Erica）！
原來Erica近日為咗推銷網店嘅護膚品，特別搵咗王宗堯拍廣告。佢哋日前喺清水灣拍攝，廣告講王宗堯喺雪地向Erica求婚，未來外父更親手將愛女隻手交到王宗堯手上。Erica特登安排咗親生爹哋客串，袁爸爸猛話好玩。
工作人員為咗營造浪漫場景，佢哋用咗300包共重8,000公斤嘅幼鹽鋪地扮雪景，王宗堯跪地向女方求婚，Erica不單教男神將戒指套喺自己左手中指，更出動埋真老公林雨陽送嘅三卡私伙求婚鑽戒。
王宗堯做戲做全套，向人妻袁彌明下跪求婚。
王宗堯轉頭攬實袁彌明扮咀嘴，真係鼻貼鼻㗎！
享受被掹毛
撇甩老公攬男神嘅Erica話老公呷醋有微言，所以佢唔准老公嚟探班，Erica話：「老公猛問點解唔搵番佢拍，咁畫面問題嘛，返去我會扮BB𠱁番佢。」而王宗堯就話：「拍攝前一日，我撞見雨陽都有運路走，要攬好朋友老婆，話拍戲箒，都有啲尷尬，投入得嚟唔可以過。」王宗堯自爆以往拍拖，享受女友幫佢掹毛，佢澄清：「痛得嚟好享受，掹嘅係眉毛，修眉咋，唔好亂諗。」
撰文：馮仁昭
馮仁昭
from:
http://hk.apple.nextmedia ... 150512/19143834
