王宗堯自薦為陳詩慧（中）執導新歌MV。
香港近日發生太多事情，無論係新聞自由遭扼殺、何韻詩因為政治因素被取消演出、暗角七警事件，以至銅鑼灣書店事件，港人嘅自由同尊嚴都遭受嚴重踐踏。一向敢言嘅王宗堯，見土生土長音樂人陳詩慧近日創作英文歌《We're Not Afraid》，激勵港人抵抗強權嘅勇氣同決心，佢就自薦為MV執導，而呢首歌，會喺7.1推出。
《We're Not Afraid》預告宣傳片噚日網上搶先睇，由雨傘革命開始到獅子山下作結，中間穿插何韻詩接受英國廣播公司（BBC）訪問、林榮基講述銅鑼灣書店事件等新聞畫面，而《蘋果日報》職工會、香港空中服務員工總會都有協助拍攝。
王宗堯邀得《蘋果日報》職工會代表協助MV拍攝工作。
用新聞角度
MV喺7.1出街，宗堯話唔擔心敏感，佢噚日話：「我哋係想表達打不死、無畏無懼精神，連咁都怕咪好驚？我想帶出好大、好深嘅含義，所以用新聞自由角度去燃點，畀番大家光芒同希望。近日火災，香港人係好團結，可惜去到一啲權力架構、高層面對政策時，我哋會俾人打壓，但信念清晰話畀我哋知，必需要捍衞新聞自由，抗衡強權，我哋一定要戰鬥到底，唔應該放棄。」至於陳詩慧就話：「我只係純粹想寫一隻宣揚愛，同埋為港人打氣嘅歌。」
撰文：馮仁昭
from:
http://hk.apple.nextmedia ... 160627/19670981
