袁彌明（Erica），05年參選香港小姐，離開無綫後又狂數舊東家衰嘢，抽水大大力被網友封為「女版陶傑」，'10開始踩入政壇，去年跟慢咇（陳志全）加入黄毓民的人民力量，將出戰立法會新界東選區，口話唔想再提無綫，但落區宣傳時卻自我介紹說：「我係港姐袁彌明。」、又自言：「我政黨有好多專業人士，又有老闆……我自己都係老闆啦，我哋根本可以攤大手板唔憂㗎！」辛苦晒！
我喺美國讀書時都一直有關心香港政治，早2年遇到一班志同道合，組成「選民力量」去監察政府及政黨，佢哋好多都係專業人士，又有老闆，我自己都係老闆（化妝及美容生意），我哋根本可以攤大手板唔使憂，我都可以同男友煮吓飯就過一日，我哋出嚟選，係因為我覺得現在香港形勢好危急……好似國民教育咁，雖然參選後的生活改變晒，又同拍拖三年嘅男友分手，但我一啲都冇後悔。
我05年選港姐，當時打算一係入娛樂圈、一係做生意，有名氣做生意可以方便啲，好似張玉珊、陳妙瑛咁成功，有諗過喺娛樂圈發展得好的話，會繼續留低發展，可惜電視台嘅遊戲規則唔適合我，生日要送禮，日日打畀高層噓寒問暖，sorry我做唔到！
同屬人民力量的袁彌明及慢咇（陳志全）（右）以新丁姿態聯袂參選新界東，黄毓民亦長期傍實為兩人助選。
袁彌明善於利用YouTube做宣傳平台，佢於一個月前開始製作了幾集《政治BB班》影片，頭2集均有過十萬點擊率，而最後的第3輯，上載一星期亦過4萬8的點擊率
未跑出袁彌明已身體力行造福街坊，上週五（10日）於上水拉票期間，袁落力到忘我境界。記者提過她要小心走光都唔理，難怪樓下班街坊望極唔走。
現今電視劇對白內容白癡過卡通片，呢啲垃圾劇要我做都唔enjoy，近年選港姐已經唔係一條出路，呢幾年有幾多個噏得出名？今年港姐改選制咪又係無聊，at the end咪又係內定。
其實唔想再同TVB扯上關係，唔想再幫佢哋賣廣告（但她早前又翻爆被樂易玲禁錮簽約），我知高登仔話我係「女版陶傑」，我根本唔想再提呢個人，高登啲舊聞同評論亦唔想再提。（有人懷疑你在YouTube的「政治BB班」是人網老闆蕭若元代寫喎），梗係唔係啦，點解你啲雜誌咁鍾意問負面嘢，如果係蕭生寫嘅，佢嘅層次深到大家都唔明，呢個「BB班」嘅內容都係我一手一腳寫嘅。
