16年港姐冠軍馮盈盈，參選期間已經公開承認有個醫生男友Martin，為了mark實筍盤10優醫生男友，更不時將二人親暱相放上社交平台；日前兩人到淺水灣拍拖，一身戰鬥格露肩短褲曬長腿的馮盈盈，同Martin開餐好行街又好都狂selfie，其間馮盈盈更突然姣爆嘟嘴扮啜男友，離開時，馮盈盈更繑實兼挨住Martin行去攞車，未卸任已經放低港姐高貴形象。
一離開餐廳，馮盈盈即刻繑實男友。
兩個係咁狂selfie，乜嘢角度都影齊！
喺男友面前，食到擘大口都唔介意。
Martin做龍友帶埋相機影女友。
去到商場，兩人十指緊扣。曬藍寶石戒指
有「粗口港姐」之稱的馮盈盈，曾經在社交平台爆粗，似有損港姐高貴形象，參選時已被指為了當醫生太太，而飛甩「毒男」前度，仲不時公開曬與十優醫生男友Martin親密合照來宣示主權。去年九月，更在ig大曬Martin所送的藍寶石戒指，暗示男友跪地求婚。
日前兩人到淺水灣拍拖開餐，Martin對女友果然千依百順，知道女友鍾意曬靚樣，Martin亦有備而來，攞定私伙相機做龍友，幫女友影低靚相。
男友揸機，只見馮盈盈一嚟已經自動波擺出七分面對鏡頭，Martin影完一輪，即刻俾相機女友過目，馮盈盈睇相亦意見多多，身形纖瘦的她，原來相當大食，點了漢堡加薯條，又有大大杯飲品，一直食唔停，反而Martin就係咁睇手機，又同女友開心share，全程無乜點食嘢。
為箍男友，馮盈盈曬埋嘴相宣示主權。
去年九月，馮盈盈大曬收到藍寶石戒指，暗示男友跪地求婚。
當選後，馮盈盈被安排演出《千奇百趣特攻隊》和《學是學非》。
攬到實一實
可能係坐正餐廳對開梳化位，最初兩人表現不太親密，食食嚇Martin已經醒目攞手機同馮盈盈selfie，影完左邊影右邊，其間馮盈盈更突然姣爆嘟長嘴想啜男友面珠，個嘴成個吸盤咁十分搞笑。
吃了近一小時，二人埋單離開，離開餐廳後，馮盈盈已即時繑實男友一齊行，沿途行上樓梯，Martin就從腰環抱攬到女友實一實，隻手仲要伸到女友胸部附近徘徊，馮盈盈唔介意之餘仲表現得好享受冧到爆，跟住仲俾足反應，成個身挨曬落男友度。
去到商場，兩人仲未影夠，Martin繼續龍友上身再揸機，當正馮盈盈係私影model一樣，靠住座椅又影一餐，搞了十分鐘，終於捨得走，行到車旁邊，Martin更體貼幫女友開埋車門，當女友公主一樣。
男友Martin幫馮盈盈開埋車門，好有風度。
為了掩飾自己係港女，馮盈盈主動俾錢埋單。
Martin隻手攬到上女友胸位附近兜底，挨住行都相當火辣辣。
以前金毛look都分享埋。
性感泳衣相都係小兒科。粗口港姐
同麥明詩一樣，馮盈盈都係大熱勝出。
現年二十三歲的馮盈盈，16年以大熱姿態勝出奪冠軍，參選期間已經是風頭躉的馮盈盈，當選不夠廿四小時，其facebook即被網民起底，爆出她於14年佔中期間，不時以極流利的粗言穢語留言，更爆粗鬧特首梁振英，即被封為「粗口港姐」，有損港姐高貴形象；及後馮盈盈即時解釋，只係與最親朋友抒發情緒，平時日常生活都唔會講。
撰文：娛樂組
攝影、攝錄：楊紫、李玄、瀚鍾
