1袁彌明日前自爆搭上政界新歡，原來就係前香港人網CEO林雨陽，佢哋日前仲拍住拖去便利店買嘢㖭。
【大坑】袁彌明去年被一名「癡漢」恐嚇騷擾，對方罪成，案件叫做告一段落，袁彌明日前夜麻麻10點幾喺大坑嘅七仔買嘢，身邊多咗個觀音兵傍到實，睇嚟有人護花真係令佢安心啲。睇真啲護花使者原來係啱啱摺埋嘅香港人網行政總裁林雨陽，佢仲係公民黨創黨黨員，難怪袁彌明近日甜到漏自爆同政界人士撻着，睇落佢哋外形同高度都好襯。
2.
林雨陽同袁彌明買完嘢後返尚巒愛巢。
3.
佢哋好避忌咁前後腳行。
袁彌明同林雨陽（中）曾一齊出席時事活動。
男友畀錢
袁彌明同林雨陽熱戀中，見少一秒都心掛掛，佢哋當日孖住去便利店買嘢，男方負責畀錢，袁彌明笑騎騎跟住走，佢哋買完嘢就一前一後好避忌咁孖住返大坑豪宅尚巒。林雨陽早年曾喺商台做過主持，有傳佢同卓韻芝拍過拖。
同林雨陽拍拖斷正嘅袁彌明，噚日記者打電話畀佢求證，佢話：「係咩，影到乜嘢相？我哋嗰日成班人開完會，慢必先走。」之後再打多次畀袁彌明，問佢係咪同林雨陽拍拖？佢話：「未穩定，唔講住。」講到林雨陽曾經傳過同卓韻芝拍拖，袁彌明毫不在乎話：「人哋嘅歷史我唔關心亦唔評論，你問番佢啦，我唔知。」至於林雨陽就用開緊會做藉口匆匆收線。
