近年，越嚟越多人開始崇尚素食主義，亦都越嚟越多人奉行Green Monday，希望食得更健康兼減少碳排放。但其實唔正確咁崇尚素食主義，反而會影響身體健康！不妨睇下你會唔會對素食有以下誤解：
素食誤解1：「我專揀飯、意大利粉同薯仔做晚餐。」
無錯，呢啲都係有益嘅食物，但係你有無留意到佢哋都係五穀類。要攝取日常生活所需嘅營養，你每餐需要進食至少3類食物，包括五穀、蔬菜、豆類同其他含蛋白質嘅食品。下次不妨試下扁豆蕃茄意大利粉或者雜菜豆腐糙米炒飯（扁豆同豆腐都含豐富蛋白質！），食一餐高營養價值又可口嘅晚餐！
素食誤解2 「出街食時，我多數點沙律或者薯條。」
呢個配搭既無蛋白質，又無奶類，横睇掂睇都唔係一個完整嘅菜單。加上炸薯條含有極高脂肪，而餐廳又多數採用營養價值同水差唔多嘅西生菜（西菜有近94%係水分！），總括嚟講，呢種餐單分分鐘添上無謂嘅磅數，而你又無法吸取所需嘅營養。不如點個焗薯同配有蕃茄、紅蘿蔔嘅菠菜沙律，或者索性揀個素菜Pizza（芝士入面都有蛋白質呢！）。飲品唔好再揀汽水，而揀含有蛋白質嘅牛奶。甜品嚟個水果Yogurt芭菲，做個嘅健康CG!。
素食誤解3：「我可以靠supplement吸取足夠嘅鐵質同蛋白質。」
欠缺肉類嘅餐單，蛋白質同鐵質含量自然偏低，但維他命丸同其他補給品並唔係解決問題嘅上策。事實上，食唔同種類嘅素食品先係吸取蛋白質同維他命嘅更好方法，因為咁樣先可以確保你同時得到日常所需嘅其他營養。花生醬、豆、豆類同麥片都係含豐富鐵質同蛋白質嘅好選擇。
素食誤解4 「屋企人唔係素食者，一齊食飯我通常淨係食伴菜。」
向你屋企人解釋食素唔單止代表唔食肉，而係用高蛋白質嘅食品代替肉類。買定素食包放喺雪櫃，只要叮一叮翻熱，你就可以隨時有美味嘅主菜，唔使餐餐食伴菜。可以參考香港品味高素食學會（
www.hightaste.net）嘅食譜，自告奮勇為家人炮製一餐素菜大餐。你亦可以喺週末時煮定一大碟素菜（如芝士蒜香茄子），翻熱後就可作為平日嘅主菜啦。
