無綫豪擲4億買咗出年2014巴西世界盃獨家播映權，用咗咁多錢，梗係要喺廣告度搵番錢幫補啦。雖然巴西世界盃出年6月先開始，但無綫為咗吸廣告，下星期就會全面出擊宣傳。無綫下星期二（17日）會喺九龍香格里拉酒店搞一個大型世界盃節目巡禮，為咗吸引廣告商落廣告，除咗安排馬賽、葉翠翠、陳展鵬、洪永城同陳智燊等30幾位藝員撐場之外，仲搵咗10位惹火又性感嘅森巴舞女郎到場搞氣氛，將成個巡禮搞到巴西嘉年華會咁。
無綫下星期二會舉行世界盃節目巡禮，請馬賽、葉翠翠同洪永城等30位藝員晒冷，頴廣告商落廣告。
下周開始宣傳
除咗世界盃節目巡禮之外，翡翠台今個月尾開始逢星期日晚11點推出有關世界盃嘅體育節目，由今個月做到世界盃開鑼為止，另外香港時間今年12月7號凌晨時分喺巴西舉行嘅世界盃分組賽抽籤儀式，無綫已經決定直播成個抽籤過程，又會搞世界盃倒數活動，總之由下星期開始，無綫會全力谷波谷足成年。
無綫外事部副總監曾醒明日前喺電話度話：「下星期二係會搞一個專為世界盃嘅節目巡禮，本身無綫每年全台節目巡禮就會安排喺11月7號。」
from:
http://hk.apple.nextmedia ... 130913/18420828
