最近有報道話黃宗澤（Bosco）同胡杏兒甩拖之後唔單止冇朋友做，就算Bosco同杏兒個好姊妹胡定欣，喺拍攝無綫新劇《貓屎媽媽》期間亦一樣冇偈傾，事關Bosco一直想箍煲，但定欣唔單止力阻杏兒食回頭草，仲成日搞飯局介紹男仔畀杏兒識，所以辣㷫Bosco囉。咁啱得咁蹺，前晚定欣又約咗杏兒飯局，今次仲有埋《求愛大作戰》主持兼導師陳莉敏（Queenie）喺度，莫非Queenie過幾招畀剩女杏兒，等佢早日搵個好對象？
胡杏兒飯局原來有《求愛》導師Queenie喺度，胡定欣同姚子羚都有帶埋男友赴會。
定欣男友夠大方
前晚杏兒同定欣、定欣男友沈柏淳（Patt）、胡蓓蔚、姚子羚以及男友Patrick等一齊去中環鏞記附近開餐，食到凌晨一點齊齊離開，但最離奇係呢個飯局竟然Queenie都有份，佢哋一行多人原本想喺鏞記門口截的士，但等極冇車，於是行去置地廣場附近截車，其間姚子羚男友Patrick發現記者就即刻彈開，之後仲唔見咗人，反而定欣男友Patt大方得多。杏兒同Queenie、胡蓓蔚以及一男一女朋友上咗部的士離開，定欣、Patt及姚子羚就上另一部的士，Patt幫手開車門仲同記者揮手拜拜，相當大方得體。
杏兒（左）噚日凌晨飯局後離開，冇仔拖嘅佢惟有拖實胡蓓蔚邊行邊講笑。
胡定欣蹺實男友Patt，認真甜蜜。
上年杏兒宣佈同黃宗澤分手，有傳係杏兒難忍男友花心所致。微博圖片
噚日記者打電話畀Queenie，問係咪介紹男友畀杏兒認識？佢話：「我邊咁本事吖！係胡蓓蔚介紹我哋識，大家有common friend，女仔gathering啫。」
採訪、攝影：梁繼光、黃曉程、朱志聰
from:
http://hk.apple.nextmedia ... 130811/18373291
