李施嬅（前名李詩韻)日前就被爆喺陳耀全監製劇集《純熟意外》，就由女主角變成大茄，套劇變咗由蔡思貝孭飛，日前李施嬅同蔡思貝一齊宣傳時，疑似搶人主角做嘅蔡思貝，反而全程都黑面喎，昨日就有週刊報導話，李施嬅唔甘心淪為大茄，急約圈中好姊妹，即「胡說八道會」嘅胡杏兒、胡蓓蔚同胡定欣食tea，急謀反擊對策。
出道多年嘅李施嬅，自從03年選完港姐入行，好不容易等到《樓奴》蔡堅菁一角，李施嬅名正言順做女主角，點知最近播放嘅劇集《純熟》，卻由女主角變成大茄，蔡思貝就坐正做主角，上週李施嬅就同蔡思貝等人一齊宣傳，身為「女主角」嘅蔡思貝就全程黑面。
俾人搶完女主角再被黑面嘅李施嬅，當然心有不甘啦，宣傳後佢就即約好姊妹胡杏兒、胡定欣同胡蓓蔚「三胡」，齊到半島酒店逛街同食high tea。報導話，李施嬅先自己一個人係半島嘅地庫逛行，期間不停㩒手機，之後就走咗去半島大堂，原來胡杏兒同胡蓓蔚已經到咗，三女見面即刻嚟個深情擁抱先，之後胡杏兒問候李施嬅，問佢係咪好慘之餘，更好心疼咁用力抱咗佢一嚇。唔知係咪太感動呢，報導話見到李施嬅一度眼濕濕喎！傾咗一輪，李施嬅開始有番啲笑容，胡定欣先到，四個女人不停咁謀對策，傾足三個鐘後，四人先笑住離開。
據報導嘅知情人士話，李施嬅今次咁唔開心，全因感覺被跣，話當時有人搵佢時，講明話佢係做女一，仲一人分飾幾角，施嬅覺得好有發揮就即時答應，點知開鏡時先知多咗個蔡思貝，自己仲要淪為女二，最後啲戲仲被刪都唔知，佢當然會唔開心啦！知情人士仲話，除咗戲份被刪唔開心外，李施嬅最嬲嘅係蔡思貝態度囂張。報導仲話，蔡思貝早喺拍攝陳耀全監製嘅《鐵馬戰車》時，已經有傳蔡思貝狂冧對方，今次就成功令自己嘅角色同李施嬅對調，坐正做女一，而週刊亦有就呢件事問番蔡思貝，但蔡思貝只話呢啲事佢控制唔到喎，只會做好自己本份。
from:
http://hk.apple.nextmedia ... 160615/19655100
