蕭定一揸弗的中國3D數碼昨日假銅鑼灣HMV舉行記者會，宣佈將收購匯友資本旗下附屬公司HMV M&E Limited已發行股本約81.63%，總代價為4.08億港元，旗下藝人張智霖（Chilam）、胡杏兒、周秀娜、鄭欣宜、周柏豪、連詩雅、何佩瑜（Jeana）等盛裝撐場，人妻杏兒著黑色喱士中門大開透視衫搶鏡，力壓著deep V西裝的Jeana及短裙騷腿的娜姐。
記者大讚人妻杏兒性感，她笑說：「冇乜，好安全，打觔斗都冇事。」老公有否過目？她坦言：「冇睇過，設計若隱若現呃到人。」做人妻後可以大解放？她說：「人妻前都已經好開放，一直冇問老公，衣著佢冇理，反而擔心我拍親熱戲，佢會呷醋。」杏兒表示下月將復工，問會否跟老公拍內地真人騷？她說：「老公廣東話麻麻哋，同埋佢係圈外人。」
此外，Chilam在店內有兩架擺放影碟及演唱會DVD，他說：「多謝咁有心，見公司越嚟越強大，好有安全感。」記者指他是一哥，Chilam笑笑說：「蕭定一先係一哥，公司資源分配好公平，自己盡綿力為同事度橋一齊拍電影或者做騷，義氣仔女幫嚇大家。」
Jeana中空白西裝look，真材實料露半球。
Chilam身為公司一哥，獨佔兩唱片架顯身價。
眾星空群而出，祝賀公司擴張。
Chilam爆靚靚怕雞
之前Chilam跟老婆袁詠儀（靚靚）到老撾拍真人騷《一路上有你》第二季，他大爆老婆秘密：「我哋要去放生，靚靚好驚，因為佢細過喺街市俾雞啄，最驚識飛同有尖嘴嘅嘢，原本我諗住帶佢睇心理醫生，開解心結，但都係唔好嘞。」Chilam又透露4月將拍驚嚇片，復活節一家去日本旅行：「輻射後都冇去過，聽聞最近香港輻射勁過日本，冇事嘅，去到會狂食。」
採訪：黃曉妍
攝影：仇志德
from:
http://hk.apple.nextmedia ... 160322/19539133
